Ціханоўская: Свабоды прэсы ў Беларусі няма, у краіне тры з паловай дзясяткі вязняў-журналістаў 2

Святлана Ціханоўская. Фота: ОСЦ

З нагоды гэтага дня зрабіла зварот Святлана Ціханоўская, заклікаўшы падтрымліваць незалежную прэсу.

«Нядаўна я прачытала аб тым, што жыхары Мазыра і Петрыкава скардзяцца на неадрамантаваныя дарогі. А ў Жлобіне — на ямы каля дзіцячых садкоў. І хоць мы не заўсёды заўважаем навіны з рэгіёнаў, асвятленне праблемаў важнае для тых, хто сутыкаецца з абыякавасцю мясцовых уладаў. Калі структуры адмахваюцца ад зваротаў людзей, то СМІ і журналісты — адзіны спосаб прыцягнуць увагу да праблемы. Менавіта таму рэжым старанна знішчае «чацвёртую ўладу» — бо першыя тры ён ужо падпарадкаваў сабе», — зазначае дэмакратычная лідарка Беларусі.

Сусветны рэйтынг свабоды прэсы. Беларусь на 167-м месцы за 180. Ілюстрацыя: Baj.media

«Сёння — Сусветны дзень свабоды прэсы. І гэтай свабоды ў Беларусі няма. У краіне больш за тры дзясяткі журналістаў-палітвязняў: Ларыса Шчыракова, Ігар Лосік, Марына Золатава, Кацярына Андрэева і іншыя незалежныя журналісты незаконна знаходзяцца ў турме за тое, што сумленна і непрадузята выконвалі сваю працу.

Дарагія журналісты! Дзякуй, што нягледзячы на складанасці, з якімі беларускія СМІ сутыкаліся гэтыя гады, вы працягваеце гаварыць праўду. Калі на экранах у Беларусі амаль увесь эфірны час займае парадак рэжыму, вы даяце людзям магчымасць бачыць падзеі без хлусні і маніпуляцыяў. Дзякуючы вам беларусы і беларускі не засталіся сам-насам з прапагандай. Пакуль рэжым усталёўвае цэнзуру, яны працягваюць чытаць незалежныя медыя», — дадала яна.

Па словах Ціханоўскай, у барацьбе за свабоду слова і дэмакратычныя каштоўнасці, журналістыка — адзін з найважнейшых інстытутаў.

«І мы павінныя яго зберагчы. Чытайце і падтрымлівайце нашыя СМІ, калі гэта бяспечна. Дзяліцеся цікавымі матэрыяламі і медыяпраектамі, прынамсі калі вы за мяжой. Бо рэжым не мае права ўказваць, як думаць беларусам!» — рэзюмуе Святлана Ціханоўская.

Чытайце таксама:

У індэксе свабоды прэсы Беларусь апынулася паміж Саудаўскай Аравіяй і Кубай

Беларусы напісалі 40 тысяч даносаў? Не, гэта непраўдзівае сцверджанне

«Знутры Беларусі вайна ўспрымаецца як нешта далёкае, нерэальнае, а звонку — як важнае і звышдраматычнае» — сацыёлаг Вардамацкі

Nashaniva.com