Столькі апазіцыйных лідэраў разам, як на здымках аднаго з ток‑шоу «Белсату» ў Вільні, убачыш хіба на кангрэсе дэмакратычных сілаў. Карэспандэнт НН паўдзельнічаў у запісе «Форуму» ў Вільні.
Каля ўваходу ў залю, дзе бавілі час перад запісам удзельнікі чарговага выпуску ток‑шоу «Форум», некалькі супрацоўнікаў літоўскага тэлебачання эмацыйна абмяркоўвалі склад беларускага палітычнага дэсанту, які прыехаў у Вільню на запіс перадачы: «Мілінкявічус, Шушкявічус, Лябедзька…». Лідэр АГП мог і не паспець на запіс, але такі патрапіў.
Зрэшты, падзівіцца было чаму не толькі літоўскаму журналісту, бо столькі апазіцыйных лідэраў разам убачыш хіба на якім Кангрэсе дэмакратычных сілаў.
Паўдзельнічаць у запісе прыехалі таксама рэгіянальныя палітыкі, прыйшлі і студэнты ЕГУ. І хоць апошніх не здзівіш запісамі на «Белсаце», колькасць апазіцыянераў у адным памяшканні большасць з іх уразіла: «Ого, колькі паз'язджалася!»
Тэма перадачы абяцала не абы якія жарсці, бо абмяркоўваць мусілі дыялог Еўропы з Лукашэнкам.Свае пазіцыі па пытанні запрашэння Беларусі ў праграму Еўрасаюзу «Усходняе партнёрства» з аднаго боку мусілі прадставіць Сяргей Калякін, Станіслаў Шушкевіч, Вінцук Вячорка, Андрэй Саннікаў ды Анатоль Лябедзька, з другога боку — Аляксандр Мілінкевіч, Павел Севярынец ды Людміла Гразнова.
«А дзе ж шклянка з вадой? Чым аблівацца будзеце?!» — спытаў жартам у палітыкаў хтосьці з масоўкі.
Лідэр апазіцыйных камуністаў Сяргей Калякін адказаў яму з усмешкай, што «дурная справа — няхітрая, а мы ўсё ж еўрапейскія палітыкі». Калякін у той вечар апынуўся пад пільнай увагай: спачатку рэжысёр праграмы папрасіў глядзець перад сабой, паспачуваўшы пры гэтым: «Я разумею, што вам не вельмі прыемна глядзець у той бок» (акурат насупраць сядзелі Мілінкевіч і Севярынец), потым да камуніста з першага шэрагу гледачоў кінулася жанчына (як высветлілася пазней — не зусім цвярозая). Вось толькі невядома, ці патрапяць тыя моманты ў выніковую версію ток‑шоу.
А тое, што патрапіць, можна будзе паглядзецьтэлеканале «Белсат» 12 красавіка ў нядзелю ў 21:25.
Будынак віленскага тэлецэнтру.
У кулуарах.
Сяргей Калякін і Андрэй Саннікаў.
Апошнія падрыхтаванні.
Вядучы ток-шоу Эдуард Мельнікаў.
Анатоль Лябедзька ўсё ж паспеў на «Форум».
«Мы ж еўрапейскія палітыкі!»
