Па словах лідэра Сацыял-дэмакратычнай партыі (Народная Грамада), у Цэнтральным РУУС яго збівалі адразу трое амапаўцаў.
«Як толькі пачалася акцыя салідарнасці, я адразу адчуў асаблівую ўвагу: невядомы чалавек у цывільным паказаў на мяне амапаўцам у форме – маўляў, вось гэтага ў першую чаргу затрымаць. І калі далі каманду затрымліваць, я адразу ж апынуўся ў паветры. Упершыню мяне неслі на руках мужчыны. Праўда, пры гэтым яны мяне білі нагамі па нырках», – распавёў Мікалай Статкевіч.
«У РУУС пачаліся такія рэчы, якія я за ўсю сваю багатую палітычную і адміністрацыйна-крымінальную практыку не назіраў. Усе затрыманыя 35 чалавек былі пастаўленыя да сцяны. Затым з’явілася група людзей у чорнай форме і на працягу некалькіх гадзін чуліся ўдары. Я расцэньваю ўсё гэта як псіхалагічныя і фізічныя катаванні людзей.
Мяне спрабавалі паставіць на «расцяжку». Я адмаўляўся, і мяне дастаткова доўга білі па нагах двое амапаўцаў у форме на чале з чалавекам у цывільным. Затым павалілі на зямлю. Пасля ўдараў левая нага прыпухла так, што стала ў паўтары разы большай за правую.
Тым не менш, я патлумачыў амапаўцам, што добра памятаю 1991 год, калі такія ж, як яны беглі станавіцца ў чаргу, каб закладаць адзін аднаго. Візіт Лукашэнкі ў Вільню і сустрэча з прэзідэнтам Літвы ўспрымаецца як індульгенцыя, яны думаюць, што іх зараз у Еўропе лічаць «дэмакратычнымі» і можна надалей беспакарана чыніць «беспредел». І яшчэ мне здаецца, што, верагодна, у краіне ўжо пачалася выбарчая кампанія і ўлада робіць усё, каб запужаць актыўную частку грамадства. Але спробы запужаць нас ні да чога не давядуць. Мы ўсведамляем свой доўг перад нашай краінай і пойдзем да канца. Беларускім уладам я б хацеў сказаць: наша партыя – сябра Сацінтэрна, мы азнаёмім усіх нашых партнёраў з падзеямі 16 верасня ў Менску», – заявіў палітык.
Нагадаем, што 16 верасня пры разгоне мірнай акцыі, прысвечанай да дзесятай гадавіны знікнення лідэраў апазіцыі Віктара Ганчара і Анатоля Красоўскага, у Менску былі арыштаваныя 35 чалавек. Многіх затрыманых збілі прама ў РУУС Цэнтральнага раёна Менска.
