У будынак кінулі некалькі «кактэйляў Молатава».
Як паведаміла прэс-служба ГУУС Мінска, здарэнне адбылося каля 4.40 раніцы 15 мая. На першым паверсе будынка Дома правасуддзя спрацавала пажарная сігналізацыя.
Праваахоўныя органы на месцы здарэння знайшлі бутэльку з гаручай вадкасцю і фрагменты яшчэ трох разбітых бутэлек.
Агнём усяго толькі пашкоджаны дзверы службовага ўваходу. Па факце падпалу заведзена крымінальная справа па ч.2 арт. 339 КК (хуліганства).
На сайце charter97.org паведамляецца, што 15-16 мая затрымалі актывістаў грамадзянскай кампаніі «Еўрапейская Беларусь» Улада Беразова і Аляксандра Кудлаева з сынам. У іх на кватэрах правялі ператрус. Вядома, што сп. Кудлаеў знаходзіцца ў РУУС Маскоўскага раёна Мінска. Ператрус праводзілі супрацоўнікі Аддзела па барацьбе з арганізаванай злачыннасцю. Аляксандр паспеў паведаміць, што затрыманне звязана са спробай невядомых падпаліць Дом правасуддзя.
14 мая ў суддзе Партызнаскага раёна Мінска (Дом правасуддзя) быў вынесены прысуд Андрэю Саннікаву, каардынатару грамадзянскай кампаніі «Еўрапейская Беларусь».
