Najbolš paśpiachovy ŭ katehoryi «aleń». Jakija palaŭničyja trafiei maje były ministr Šunievič i jaho žonka? 8

Ihar Šunievič z trafiejem. Fota: trophybook.by

Pra toje, jak u žyćci byłoha ministra ŭnutranych spraŭ važnaje palavańnie, śviedčać danyja z sajta «Kniha trafiejaŭ» — proźvišča i inicyjały Šunieviča tam sustrakajucca davoli časta. 

Miarkujučy pa ŭsim, najbolš paśpiachovym Ihar Šunievič akazaŭsia ŭ katehoryi «aleń» — tam u jaho čatyry ŭznaharody. U palavańni na łasia — try ŭznaharody, na astatnich žyvioł, vidać, były ministr radziej paluje. 

Katehoryja «aleń». Skryn sajta trophybook.by

Trafiei palaŭničaha na sajcie fiksujucca z 2014 hoda (tady jon kala dvuch hadoŭ zajmaŭ pasadu ministra ŭnutranych spraŭ Biełarusi). Tady jon zabiŭ jeŭrapiejskaha łasia ŭ Niaśvižskim rajonie i trafiej rahoŭ atrymaŭ srebny miedal. U 2018-m znoŭ ža rohi jeŭrapiejskaha łasia (zabity ŭ turkompleksie Čyrvony Bor u Vierchniadźvinskim rajonie) — i bronzavy miedal. U tym ža rajonie i z takim miedalom Šunievič zdabyŭ rohi łasia ŭ 2019 hodzie.

Katehoryja «łoś». Skryn sajta trophybook.by

Na vysakarodnych jeŭrapiejskich aleniaŭ Šunievič palavaŭ u Čyrvonym Bary. Za rohi hetych žyvioł jon atrymaŭ ažno try załatyja miedali (u 2017, 2018 i 2019 hadach) i adzin srebny (u 2020 hodzie). 

Hod tamu Ihar Šunievič raspaviadaŭ u intervju rasijskamu ahienctvu «Sputnik» pra svaje mary ŭ palavańni, chobi žonki i žadańnie stvaryć nacyjanalnuju knihu palaŭničych trafiejaŭ i navat muziej.

«Maje mary dastatkova prymityŭnyja. Ja zaŭsiody maru pra novuju niejkuju palaŭničuju zbroju. Drennaj zbroi nie byvaje, byvaje mała hrošaj na jaje nabyćcio», — kazaŭ jon.

Pra trafiei jon dadavaŭ, što tolki ŭ redkich vypadkach papaŭniaje svaju kalekcyju i navučyŭsia admaŭlacca ad strełaŭ. I adznačaŭ, što jahonaja žonka taksama zajmajecca palavańniem. 

«U asnoŭnym heta trafiei majoj žonki. Siońnia jana znachodzicca na piku palaŭničaj karjery svajoj. Jana spaścihaje niejkija novyja haryzonty, rubiažy. I jaje pieramohi nad saboj i jaje zavajovy dajuć mnie bolš zadavalnieńnia, čym svaje ŭłasnyja», — skazaŭ Šunievič i pryznaŭsia, što za apošni čas samym vialikim ščaściem dla jaho było padaryć žoncy hodnuju palaŭničuju zbroju na dzień naradžeńnia.

Žonka Šunieviča Taćciana Uładzimiraŭna taksama jość na sajcie «Trafiejnaja kniha». Jana maje ŭznaharody za palavańnie na łasia i alenia (dva załatyja miedali, adzin srebny i adzin bronzavy).

Taćciana Šunievič na palavańni. Fota: trophybook.by

Akramia pary Šunievičaŭ, u knizie trafiejaŭ časta zhadvajucca proźvišča i inicyjały byłoha premjer-ministra Siarhieja Rumasa, ciapierašniaha premjera Ramana Hałoŭčanki i inšych čynoŭnikaŭ. Taksama ŭznaharody atrymlivaŭ Dźmitryj Bohuš, biznesmien i były namieśnik staršyni Technabanka, jaki ciapier pryznany palitźniavolenym. 

Čytajcie taksama:

«Heta čałaviek, jaki nie baicca kryvi». Šunievič raspavioŭ, jak źbirajucca vykarystoŭvać palaŭničych

«Kolkaść miadźviedziaŭ hałapuje ŭ našaj krainie». Šunievič prapanavaŭ šlachi vyrašeńnia prablemy

Ihar Šunievič vyrašyŭ zasnavać arhanizacyju žančyn-palaŭničych

Kuprejčyk raskazaŭ pra syna Kubrakova i plamieńnika Šunieviča, ź jakimi vučyŭsia razam

2

9

1

2

5

25

Nashaniva.com