1 кастрычніка два з трох менскіх заводаў прыпынілі пастаўкі малака ў гарадзкія крамы.
Беларускія малаказаводы сутыкнуліся з праблемай дэфіцыту сыравіны. Вытворцы малака вывозяць сваю прадукцыю ў Расею, дзе закупачныя кошты ўдвая вышэйшыя.
Праблемы з сыравінай на сталічных малаказаводах пэрыядычна ўзьнікалі на працягу верасьня, высьветліла газэта «Салідарнасьць». 1 кастрычніка два з трох менскіх заводаў прыпынілі пастаўкі малака ў гарадзкія крамы. Гарадзкі малаказавод №2 забясьпечыў малаком дзіцячыя садкі і больніцы, а ў крамы патрапілі толькі малочныя прадукты. Менскія заводы на сёньня атрымліваюць ад пастаўшчыкоў толькі палову неабходнага аб’ёму сыравіны. Сытуацыю на прадпрыемствах тлумачаць тым, што ў Расеі закупачныя кошты ўдвая вышэйшыя. Туды і зьбягае беларускае малако. Паказальна тое, што ў Міністэрстве сельскай гаспадаркі і харчу, а таксама ў Менгархарчпраме ад камэнтароў адмовіліся.
Можна дапусьціць, што вытворцы малака карыстаюцца ня толькі выгаднай кан’юнктурай, але й адтэрміноўкай Рассельнаснаглядам ўводу новага парадку імпарту прадукцыі жывёлагадоўлі зь Беларусі. Зь 1 лістапада пастаўкі будуць дазволеныя толькі тым заводам, якія пройдуць атэстацыю і атрымаюць права на экспарт.
Варта адзначыць, што ў параўнаньні зь мінулым годам назіраецца рост вытворчасьці малочнай прадукцыі. Малака, у прыватнасьці, выпусьцілі на 10% больш.
У Беларусі за Лукашэнкам ужо здараліся перабоі з пастаўкамі ў крамы малочных прадуктаў. Як і цяпер, прычынай былі больш прывабныя закупачныя кошты ў Расеі. Тады пытаньне вырашылі адміністратыўным спосабам — забаранілі вываз сыравіны. Як вырашыцца пытаньне гэтым разам — падвысяць закупачныя кошты, ці забароняць вывозіць малако, пакуль няясна. Першы спосаб ударыць па спажыўцах, другі — па вытворцах. У дадзеным выпадку выклікае цікавасьць заява прэзыдэнта ў часе «Дажынак» наконт экспартных магчымасьцяў вытворцаў малака:
«Сёньня ў чарзе стаяць расейцы, купляюць па вялікай цане малочныя і мясныя прадукты. Эўрапэйскія краіны гатовыя набываць у агромістых колькасьцях масла, рэалізацыя якога яшчэ некалькі год таму была праблемай».
Каментары