Казімір Малевіч. Аўтапартрэт.
У гутарцы з расейскім «Коммерсантом» дырэктар «Сотбіс-Расея» Міхаіл Каменскі разважае, чаму так неабходна, каб выстаўленая на аўкцыёне Sotheby`s у Нью-Ёрку «Супрэматычная кампазыцыя» Казіміра Малевіча, а таксама іншыя творы вялікага мастака, патрапілі ў Расею. Сярод іншага М. Каменскі кажа: «Супрэматызм Малевіча — гэта кропка адліку мастацтва сучаснасьці, яго стылеўтваральная плятформа.
Брэнд «Расея» пабудаваны на Малевічы. Ступень яго пранікненьня ў сусьветную культуру такая, што я ня ведаю з чым яе можна супаставіць.Практычна ўся візуальнасьць нашага часу — дызайн, архітэктура, мода, кінематограф, рэкляма — пабудаваныя на канцэптуальных рашэньнях Малевіча альбо мастакоў, што каранямі паходзяць зь яго філязофіі і ягонай школы. Малевіч — гэта наш сымбаль веры, і ён павінен быць расейскім».
Даведка
Хто яшчэ лічыць Казіміра Малевіча сваім мастаком?Беларускім і расейскім мастаком Малевіча называе slounik.org. Беларуская Вікіпэдыя, як высьвятляецца, яшчэ ня мае старонкі пра знанага мастака. Беларускі сьлед прасочваецца толькі на харвацкай Вікіпэдыі, якая называе паходжаньне бацькоў Малевіча польска-беларускім. Расейская Вікіпэдыі акрэсьлівае творцу, як расейска-савецкага мастака, італьянская і гішпанская – расейскім, славенская – расейскім мастаком украінскага паходжаньня. Украінскім мастаком стваральніка супрэматызму лічаць украінская, нямецкая ды баўгарская Вікіпэдыі, а таксама сайт artcyclopedia.com. Польская Вікіпэдыя – мастаком польскага паходжаньня, народжаным пад Кіевам. Ангельская ды француская Вікіпэдыі падаюць інфармацыю пра паходжаньне аўтара «Чорнага квадрату» нэўтральна.
0
0
0
0
0
0
