Прэс‑сакратар міністэрства замежных справаў Андрэй Папоў заявіў, што кіраўнік Беларусі нічога не казаў пра намеры нашай краіны разьмясьціць расейскія ракетныя комплексы. «Іскандэры» купяць ня хутка і не ў адказ на ПРА.
Прэс‑сакратар міністэрства замежных справаў Андрэй Папоў заявіў, што ў матэрыяле ў газэце «Wall Street Journal» была дапушчаная няверная інтэрпрэтацыя словаў кіраўніка Беларусі. Гэта датычыцца выказваньняў адносна плянаў ЗША па разгортваньні сыстэмы ПРА ў Эўропе і дзеяньняў у адказ Расеі, уключна з разьмяшчэньнем комплексаў «Іскандэр».
Папоў адзначыў, што скажэньне сэнсу выказваньняў Лукашэнкі прывяло да мноства домыслаў, якія сталі повадам для няправільных ацэнак ня толькі сярод экспэртаў, але і ў палітычных колах розных дзяржаў.
«У сувязі з гэтым хачу заявіць, што кіраўнік Беларусі не рабіў ніякіх заява пра намеры нашай краіны разьмясьціць расейскія ракетныя комплексы «Іскандэр». У гэтым лёгка пераканацца, калі зьверыцца з стэнаграмай інтэрвію Лукашэнкі газэце «Wall Street Journal», разьмешчанай на сайце кіраўніка Беларусі», — адзначыў А.Папоў.
Далей адзначаецца, што ў рамках праграмы пераўзбраеньня войска паступова замяняюцца старыя ракетныя комплексы на новыя, у тым ліку, магчыма, і «Іскандэры», але гэта нават «ня пляны заўтрашняга дня».
Нагадаем, што напярэдадні афіцыйны прадстаўнік Дзярждэпартамента ЗША Роберт Вуд заявіў, што разьмяшчэньне расейскіх ракетных комплексаў «Іскандэр» на тэрыторыі Беларусі не будзе спрыяць захаваньню стабільнасьці ў эўрапейскім рэгіёне.
«Мы ўжо шматразова заяўлялі, што сыстэма ПРА не скіравана супраць Расеі або Беларусі», — сказаў Р.Вуд.
Цяпер чытаюць
Пяць пытанняў, якія застаюцца пасля смерці экс-выкладчыка БНТУ Шчукіна, што ўцякаў ад міліцыі3
Каментары