Наша Ніва

14:37 Па выніках мітынгу была прынятая рэзалюцыя. У ёй прапануецца зняць абмежаванні на ўвоз тавараў з Расіі, дазволіць прадпрымальнікам, незалежна ад узроўню сваяцтва, наймаць пяць чалавек, а таксама стварыць пры прэзідэнце спецкамісію для вырашэння праблем дробных гандляроў.

Шумчанка чарговы раз падкрэсліў, што прадпрымальнікі настроены міралюбіва і на канструктыўны дыялог з уладамі, але калі ўлады не прыслухаюцца да патрабаванняў, то ў 2009 г. яны (ІП) здымаюць з сябе усякую адказнасць за будучыя акцыі.

Шумчанка выступаў адзін і пасля прамовы сказаў, што мітынг скончаны і папрасіў разысціся.

На трыбуну прарваўся Алесь Макаеў, які запатрабаваў сабе слова, зазначыўшы: «Такімі патрабаваннямі, якія ёсць у рэзалюцыі, праблемы прадпрымальнікаў не вырашацца!». Алесь Макаеў звяртаецца да прысутных па-беларуску.

Шумчанка настойвае на тым, што мітынг скончаны.

Макаеў усё ж узяў слова. Ён сказаў, што калі патрабаванні не будуць выкананыя, то ў студзені будуць новыя акцыі пратэсту.

Наступная акцыя, сказаў А. Макаеў, калі патрабаванні не будуць задаволеныя, пройдзе 12 студзеня (панядзелак) на Кастрычніцкай плошчы беларускай сталіцы.

Выступіў таксама прадпрымальнік Анатоль Змітровіч са Светлагорска, які сказаў, што лакальнымі зменамі нічога не вырашыш, а трэба дамагацца прыняцця закону ад прадпрымальніцтве на 5 гадоў.

Таксама злёгку пакрытыкавалі Шумчанку, які фактычна нікому не збіраўся даваць слова.

14:30 Пачаўся мітынг. Бярэ ўдзел каля 2,5 тыс. — 3 тыс. чалавек. Шумчанка выступае вельмі эмацыйна. Прадпрымальнікі бурна -- як на стадыёне ці канцэрце - рэагуюць на кожны сказ.

14:15 Галава калоны дайшла да Бангалору.

13:45 Галава шэсця ўжо дайшла вуліцай Сурганава да вуліцы Якуба Коласа.

Ідуць усе досыць спакойна, правілы дарожнага руху не парушаюць. Збольшага ціха, толькі раз-пораз гукаюць «Работу».

Відэа Яраслава Сцешыка

Эксперты зазначаюць, што людзей сабралася не меней, чым на "Чарнобыльскім шляху-2008".

13:32 У шэсці бярэ ўдзел каля 2 тыс. чалавек. З Алесем Таўстыкам засталіся каля двух дзясяткаў тых, хто мае намер ісці да Адміністрацыі прэзідэнта.

13:27 Пачалося шэсце ў бок плошчы, названай у гонар горада-пабраціма беларускай сталіцы.

Шумчанка: Застаўся толькі адзін чалавек, якому могуць паверыць прадпрымальнікі – гэта прэзідэнт

Анатоль Шумчанка сказаў, што не варта ператвараць акцыю ў палітычную, таму варта пайсці да парку Дружбу народаў.

«Не месца красіць чалавека, а чалавек - месца», - сказаў ён.

Сцягоў амаль няма, апроч аднаго, што трымае Анатоль Шумчанка: «Марш предпринимателей». Людзі трымаюць у руках асноўным шыльдачкі.

Таўстыка працягвае заклікаць ісці да Адміністрацыі. Але з ім салідарызаваліся толькі каля двух дзясяткаў чалавек.

13:22 Алесь Таўстыка кажа, што ісці не на сабачнік (парк г.зв. Дружбы народаў), а да Адміністрацыі прэзідэнта, дзе і адстойваць свае правы.

Анатоль Шумчанка парыруе, што раз акцыю арганізоўвае «Перспектыва», то яна і вырашае, ісці на Бангалор ці не.

Таўстыку горача падтрымлівае барысаўскі прадпрымальнік Віктар Гарбачоў і яшчэ некалькі паплечнікаў.

Пакуль усё абыходзіцца без рукапрыкладства. Два мужчыны ўнушальнага целаскладу, згаданыя крыху раней у сувязі з канфліктам Шумчанкі і Таўстыкі, некуды дэматэрылізаваліся.

13:18 Людзей значна паболела. Ужо недзе пад 1 000.

Лёгкі скандал паміж Таўстыкам і Шумчанкам. Таўстыку просяць апусціць сцяг «Руху за Свабоду» з надпісам «За свабоднае прадпрымальніцтва».

Шумчанка Таўстыку: «Я цябе прашу па-харошаму».

Да Алеся Таўстыкі падышлі нейкія два мужчыны.

13:11 З'явіліся расцяжкі, усе на рускай мове: «В трудные времена для государства предприниматели были и будут надежной опорой для народа», «Перспектива за предпринимателей», «Задушить тысячи, чтобы процветали единицы!», «Новые условия для ИП - достойный вклад в мировой кризис».

Шумчанка бярэ мегафон.

Сёння, падкрэсліў ён,

застаўся толькі адзін чалавек, якому могуць паверыць ІП, — гэта Аляксандр Лукашэнка.

«Мы будзем верыць толькі яму і падпісаным ім дакументам», — заявіў лідэр грамадскага аб’яднання.

Паводле слоў Шумчанкі, калі ў хуткім часе ўрад не зробіць ніякіх крокаў, «людзі выйдуць на стыхійныя акцыі». «Прадпрымальнікі будуць выходзіць не на санкцыянаваныя мітынгі, а да Дома ўрада», — цытуе словы лідэра "Перспектывы" БелаПАН.

13:07 А 13-й на пляцоўцы каля прэзідыума Акадэміі навук сабралася каля 250 чалавек. Халодна: мінус 6 паводле Цэльсія (калі лічыць паводле шкалы Фарэнгейта, то куды цяплей +20).

Пакуль толькі два сцягі Руху за Свабоду. Адзін з іх трымае Алесь Таўстыка.

Амаль усе ўдзельнікі трымаюць самаробныя сцяжкі, дзе на белым тле напісана «Предприниматели Беларуси».

Старшыня «Перспектывы» Анатоль Шумчанка, Алесь Макаеў, з грамадскіх дзеячоў пакуль толькі Вячаслаў Сіўчык. Усе жыва і дзелавіта раздаюць інтэрвію.

Калі казаць пра ўзроставы цэнз: то амаль няма моладзі і людзей сталага ўзросту. У асноўным мужчыны гадоў 30-40. Ёсць і каму болей за 40. У асноўным, «бальзакаўскі ўзрост», так сказаць.

***

Пасля плануецца шэсце па вулічных ходніках у кірунку праспекту Незалежнасці, вуліцы Сурганава і плошчы Бангалор. Затым у парку Дружбы народаў адбудзецца мітынг.