Віцэ-прэм’ер Расіі Аляксей Кудрын адказаў на заявы кіраўніка Беларусі.
Віцэ-прэм’ер Расіі Аляксей Кудрын адказаў на заявы кіраўніка Беларусі.
Віце-прэм’ер, міністр фінансаў Расіі Аляксей Кудрын лічыць неабгрунтаванымі заявы прэзідэнта Беларусі Аляксандра Лукашэнкі, які прыраўняў расійскія фінансавыя ўлады да беларускай апазіцыі.
«Я звярнуў увагу на выступы Лукашэнкі. Калі тыя, хто жадае дапамагаць Рэспубліцы Беларусь і жадае збалансаванай і стабільнай эканомікі, прыраўноўваюцца да апазіцыі, то я тады не разумею, што ж патрэбна Рэспубліцы Беларусь», — заявіў Кудрын на брыфінгу журналістам 1 чэрвеня.
Як паведамляе РИА Новости,
віце-прэм’ер нагадаў, што за апошнія паўтара года Расія выдала Беларусі крэдыты на суму каля $3 млрд. Пры гэтым ён адзначыў, што крэдыты прадстаўляліся на пэўных умовах. У прыватнасці, пры вылучэнні чарговага транша да такіх умоваў адносіліся бездэфіцытны бюджэт, замарожванне заробкаў, павышэнне тарыфаў, правядзенне дэвальвацыі.
«Калі мы кажам пра тое, што трэба працягваць пэўныя меры, раптам гэта выклікае такую нечаканую рэакцыю. Нам гэта незразумела. Да ўмоваў эканамічнага характару і крытыкі ўрад Беларусі апынуўся не гатовым», — падкрэсліў Кудрын.
Па яго меркаванні, сённяшняя сітуацыя «яшчэ больш ставіць пытанне пра тое, што такая падтрымка можа апынуцца безвыніковай і неэфектыўнай».
Як раней паведамляў БелаПАН, 28 мая ў Мінску Аляксей Кудрын заявіў журналістам, што Расія адкладае выдзяленне Беларусі чарговай траншы крэдыту ў $500 млн. Па яго словах, выдзяленне транша залежыць ад эканамічнай палітыкі дзяржавы. «Гэта звязана з тым, што ў беларускай эканоміцы ўзмацняюцца дыспрапорцыі і дысбалансы, — патлумачыў Кудрын. — На наш погляд, урад Беларусі прымае недастатковыя меры, каб забяспечыць плацежаздольнасць сваёй эканомікі». У Беларусі, па яго словах,
«ідзе штучнае адцягванне крызісных з’яваў» за кошт «масіраванай крэдытнай падтрымкі».
У пятніцу, 29 мая, на нарадзе ў Мінску па бягучым пытанням сацыяльна-эканамічнага развіцця краіны Лукашэнка запатрабаваў ад ураду «не кланяцца» перад Расіяй, а ісці «шукаць шчасця ў іншым баку планеты».
«Мы ўчора назіралі цікавую сітуацыю, калі прэзідэнт Беларусі сядзіць з Уладзімірам Пуціным і абсалютна на сяброўскай ноце абмяркоўвае пытанні, пачынаючы з прыватных і сканчаючы дзяржаўнымі. І нармальнае ідзе абмеркаванне. А ў гэты час Кудрын дае прэс-канферэнцыю перад паседжаннем саюзнага Саўміна, сутнасць якой — пасеяць паніку ў Беларусі. Ён цалкам кансалідаваўся з нашымі адмарозкамі, якія тут на заходнія грошы вякаюць і пачынаюць нас вучыць працаваць. Калі ў іх такая харошая эканоміка, дык 10% падзення ВУП адкуль? У нас іншая эканоміка, але даем 1,5% росту ВУП», — заявіў Лукашэнка.
Цяпер чытаюць
Азаронак напісаў пра палітэмігранта — пасля гэтага брата і бацьку таго кінулі за краты1
Каментары