Мінск пад вадой + відэа і фоты

Сталіцу зноў заліло. Найболей дасталося шматпакутнай Нямізе. Затапіла і станцыю метро Парк Чалюскінцаў, Камароўку, раёны Фінскай запраўкі, Манежу, Партызанскі праспект, дзесяткі іншых нізінаў у розных раёнах. Толькі за паўгадзіны ў сталіцы выпала амаль палова месячнай нормы ападкаў.

На Нямізе а 15-й на ходніках вады было па калена, на праезжай частцы — па пояс, а то і па шыю.

Так, пад мастом на праспекце Пераможцаў патоп спыніў маршрутку, што ехала з мікрараёна Сухарава. Узровень вады ў ёй сягнуў вокнаў, і супрацоўнікі МНС вызвалялі людзей з машыны, выносячы дзяўчат і дзяцей на руках.

Спыніліся таксама тралейбусы, з двух тралейбусаў таксама ідзе эвакуацыя.

Супрацоўнікі Міністэрства па надзвычайных сітуацыях ратуюць людзей на спецыяльных плытах. Некалькім пенсіянерам стала кепска.

Вялікагрузныя машыны, што едуць Нямігай, падымаюць велізарныя водныя хвалі.

* * *

Вада пратачылася на станцыю метро Парк Чалюскінцаў. На станцыях метро «Усход» і «Парк Чалюскінцаў» мінскага метро з прычыны залевы па адным выхадзе, паведамілі «Інтэрфаксу» ў аддзеле унутраных спраў метрапалітэну.

* * *

Як паведаміў НН прэс‑сакратар МНС Віталь Навіцкі, пакуль няма звестак пра колькасць ахвяр стыхіі. Усе сілы скінутыя на тое, каб эвакуяваць людзей з транспарту. У дзяжурную службу пастаянна паступаюць званкі з месцаў здарэння. Самыя вялікія паступствы залевы, паводле ягоных слоў, назіраюцца ў раёне Нямігі.

* * *

Нагадаем, што ўчора моцная залева таксама прывяла да магутнага затаплення Нямігі.

Сёння яна зноў паралізавала рух транспарту па ўсім горадзе.

* * *

Прэс-служба МНС: Ахвяр стыхіі няма

«Больш за 300 чалавек эвакуяваныя і выратаваныя з грамадскага транспарту ды падвальных памяшканняў», — такую інфармацыю агучыў прэс-сакратар МНС Віталь Навіцкі. У выратаванні людзей задзейнічана каля 40 адзінак тэхнікі і вадалазная група.

Месцы, якія аказаліся найбольш небяспечнымі падчас залевы: Касцёл святых Сымона і Алены, 1-я і 3-я гарадскія клінічныя бальніцы, ВТБ Банк, станцыі метро «Усход» і «Парк Чалюскінцаў», ТЦ «Пераход».

Інфармацыю пра загінулых МНС абвяргае. Інфармацыя пра патанулага чалавека, здымак якога быў змешчаны у суполцы minsk_by, пакуль не пацвердзілася. Навіцкі патлумачыў гэта тым, што аўтар здымка не назваў месца здарэння, а па здымку яго немагчыма ідэнтыфікаваць.

* * *

Cтанцыі метро «Усход» і «Парк Чэлюскінцаў» былі часова зачыненыя

Дзеля падтаплення былі часова зачыненыя станцыі метро «Усход» і «Парк Чэлюскінцаў» у Мінску. Пра гэта БелаПАН паведаміў старшы інспектар групы інфармацыі і грамадскіх сувязяў УУС па ахове метрапалітэна Арцём Гарашэвіч.

Паводле звестак інспектара, станцыя «Усход» была зачыненая на ўваход і выхад з 15.20 да 15.35, станцыя «Парк Чэлюскінцаў — з 15.37 да 16.00. У гэты час цягнікі праходзілі гэтыя станцыі без спынення.

Пагроза падтаплення ўзнікла праз патокі дажджавой вады, якія рынулі ў падземныя пераходы і ў вестыбюлі станцый. Каб вада не трапіла на платформы і на рэйкі, станцыі і былі зачыненыя, патлумачыў Гарашэвіч.

Цяпер мінскае метро працуе ў звычайным рэжыме.

Алесь Кудрыцкі, дзякуем за фота Леаніду Маракову, Радыё Свабода, onliner.by, bialuha

* * *

Паводле прагнозу Белгідрамета, у суботу па краіне будзе воблачна з праясненнямі. Ноччу па ўсходняй палове дажджы, навальніцы,

у асобных раёнах моцныя ліўні.

Днём на большай частцы тэрыторыі краіны кароткачасовыя дажджы, па поўдні месцамі моцныя дажджы. У асобных раёнах навальніцы. Вецер заходні 4—9 м/с, пры навальніцах месцамі парывы да 15—20 м/с. Тэмпература паветра ноччу плюс 15—21°C, днём плюс 19—25°C, па Гомельскай вобласці да плюс 29°C.

• 0
• 0
• 0
• 0
• 0
• 0
• 0
• 0