Учора ва ўрочышчы Красны Беражок на Вілейчышне былі знішчаны крыжы ў гонар Расціслава Лапіцкага і іншых ахвяр савецкіх рэпрэсій. Зрабілі гэта за дзень да прыезду туды роднай сястры кіраўніка пасляваеннага антыкамуністычнага падполля на Смаргоншчыне і Мядзельшчыне 92-гадовай Алены (Вольгі) Шарэпа-Лапіцкай. Суправаджаў сп. Алену на Вілейшчыне ініцыятар ушанавання памяці рэпрэсаваных Аляксей Сюдак.
«Наша Ніва»: Аляксей, Алена Шарэпа-Лапіцкая ведала пра крыж Расцілава?
Аляксей Сюдак: Не, мы ёй не казалі. Яна ведала толькі пра камень, які сёлета знішчылі. І пры нашай папярэдняй сустрэчы выказалася за тое, каб зрабіць нешта новае на месцы расстрэлу брата. І вось мы рыхтавалі для яе сюрпрыз. Але, на жаль, нічога не атрымалася.
«НН»: Зараз вы ёй расказалі пра знішчаныя крыжы?
АС: Так.
«НН»: Якая была яе рэакцыя?
АС: Яна сказала, што разумее, чаму Расціслава і зараз баяцца нават мёртвага. Бо ён змагаўся супраць крыўды. А крыўды шмат і сёння. Таму тыя, хто рушыў, баяцца, што моладзь возьме прыклад з яе брата.
Таксама яна ўсклала кветкі да месца, дзе стаялі крыжы.
«НН»: Ці вядома, хто спрычыніўся да акта вандалізму ва ўрочышчы Красны Беражок?
АС: Учора мясцовыя жыхары нам паведамілі, што старшыня Асіпавіцкага сельсавета Мікалай Гіль разам з участковым міліцыянерам у СВК узялі транспарт, на якім паехалі рушыць крыжы. Калі мы туды прыехалі, крыжоў ужо не было.
«НН»: Што кажа старшыня сельсавета?
АС: Кажа, што не ведаў, хто ставіў крыжы, хто іх знішчыў. Маўляў, гэта не яго справа. Яшчэ, ён сказаў, што у кожнай вёсцы стаяць крыжы, і пра ўсе з іх старшыня не можа ведаць.
«НН»: За дзень на знішчэння быў пастаўлены і трэці крыж «Героям Беларусі». Крыжы былі асвечаны.
АС: Так, разам стаялі тры крыжы. 9 верасня яны былі асвечаны праваслаўным святаром. А 10 верасня іх не стала. Але мы іх абавязкова адновім. Мне ўжо тэлефануюць людзі з пытаннем: «Што трэба зрабіць?»
