Брэнд запусціў Малінаўшчызненскі спіртагарэлачны завод «Аквадзіў». Настойка была выпушчана да 70-годдзя стварэння абарончага ўмацавання, на месцы якога лукашэнкаўцы адкрылі музей з аналагічнай назвай.
Фота Уладзіміра Скрабатуна.
Пакуль «Лінія Сталіна» распаўсюджваецца толькі ў Мінскай вобласці. «З іншых рэгіёнаў не было замоў. Можа каму назва не падабаецца, каму этыкетка», — тлумачыць начальнік аддзела маркетынгу «МСГЗ-«Аквадзіў» Віталь Яворскі. Ён таксама падкрэслівае, што была выпушчана невялікая партыя настойкі. Надалей мо і ўвогуле яна будзе знятая з вытворчасці.
«Прадаваць такі напой у Беларусі — кашчунства, — абураецца рэдактар газеты «Вольнае Глыбокае» Уладзімір Скрабатун.
— Масавыя забойствы, дэпартацыі ў Сібір тут адбываліся па 1953 год — да смерці Сталіна. Я ўжо не згадваю пра татальны выезд з калгаснага раю тысячаў беларусаў-каталікоў, цэлымі вёскамі, якія засялілі потым Гданьскае Памор’е. А страта Беларуссю зямель, адарваных Сталіным і перададзеных іншым краінам? У гісторыі нашай краіны Сталін быў адназначна негатыўным персанажам».
«Лінія Сталіна» — частка пошуку заводам новых брэндаў. У бліжэйшы час бровар рыхтуецца выпусціць новыя маркі гарэлкі «Белая зорка», «Гаспадар», «Каліна красная».
