Більт пра выключэнне Шапуцькі: «Гэта будзе мець наступствы» 11

8 снежня ў Бруселі адбылася прэс-канферэнцыя па выніках сустрэчы міністраў замежных спраў краін Еўрасаюза і «Усходняга партнёрства». На мерапрыемстве прысутнічаў і міністр замежных спраў Беларусі Сяргей Мартынаў.

Беларускімі журналістамі была агучаная і сітуацыя наконт выключэння прэс-сакратаркі «Маладога фронту» Таццяны Шапуцькі. Пытанне наконт таго, як яе выключэнне паўплывае на ўдзел Беларусі ва Усходнім партнёрстве, было зададзенае кіраўніку замежнапалітычнага ведамства Швецыі Карлу Більту.

«Гэта несумненна будзе мець наступствы. Мы ўздымалі гэтае пытанне вельмі выразна ў прыватных размовах тут, — адказаў Більт. — Калі гэта выключэнне сапраўды звязана з удзелам у Форуме НДА, не з універсітэцкімі справамі, то гэта недапушчальна».

Сяргей Мартынаў выказаў жаданне таксама пракаментаваць дадзеную сітуацыю: «Урады не выключаюць студэнтаў. Гэта ўніверсітэты выключаюць. І ўніверсітэт паведаміў нам, што прычына ў адсутнасці на занятках», — заявіў Мартынаў.

На што Більт зрэагаваў іроніяй: «Я б, вядома, дадаў, што ва ўніверсітэт звярталіся прадстаўнікі праваахоўных органаў. Яны, вядома, маглі цікавіцца яе пропускамі, але звычайна гэта не ўваходзіць у іх абавязкі», — падкрэсліў ён.

Вольга Жарнасек, Брусэль

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ