18:50.
Затрыманых адпусцілі. На ўсіх былі складзеныя пратаколы адміністрацыйнага затрымання па артыкуле 23.34 «Удзел у несанкцыянаваным пікеце». Суд адбудзецца 23 снежня.
***
16 снежня ў Мінску, ля іранскага пасольства (вул. Няжданавай, 28) прайшла акцыя ў абарону дзесяці геяў Ірана (у тым ліку васьмі падлеткаў), якіх у гэтай краіне асудзілі на смерць за «садамію».
Акцыю зладзіў ЛГБТ‑рух (рух лесбіянак, геяў, бісэксуалаў і транссэксуалаў) у Беларусі.
Трое актывістаў руху — Сяргей Андросенка, Сяргей Прадзед і Аляксандр Гагарын — прыйшлі да сценаў пасольства Ірана ў Мінску з плакатам на беларускай і англійскай мовах «Спыніце забойства геяў». Яны таксама перадалі ў пасольства петыцыю з патрабаваннем спыніць пераслед геяў у гэтай краіне.
Крыху раней актывісты ЛГБТ-руху перадалі ў Адміністрацыю прэзідэнта і Міністэрства замежных спраў Беларусі ліст з просьбай прадпрыняць магчымыя дыпламатычныя высілкі з мэтай паўплываць на Тэгеран у справе адмены смяротнага прысуду асуджаным асобам.
* * *
Праз 15 хвілін перамоваў/пікіровак з міліцыяй удзельнікі акцыі, а таксама карэспандэнтка «НН» Настасся Шамрэй былі затрыманыя, іх адвезлі ў Савецкі РУУС Мінска.
* * *
Цяпер іх прывезлі да будынка РУУС, але адвялі ў не ў сам будынак, а ў апорны пункт побач з ім.
Статус затрыманых, паведамляе Настасся, пакуль няясны. Ім нічога не паведамляюць. Пратаколаў пакуль таксама не складаюць.
* * *
15:56
Усім затрыманым паведамілі, што яны затрыманыя як удзельнікі несанкцыянаванай акцыі, пратаколаў пакуль не складаюць, выклікаюць па адным, прабіваюць па базе, выясняюць асобу.
Міліцыянеры з сябе пакуль строяць лагодных, кепскія яшчэ не заходзілі, жартуюць самі затрыманыя.
16:32
Настассю Шамрэй пасля праверкі журналіцскага пасведчання і гутаркі адпусціілі, трох хлопцаў працягваюць трымаць у міліцыі, у іх бяруць паказанні, але невядома, ці складаюць пратаколы.