Апошняя нядзеля мела асаблівую дату: 10.10.10. Да гэтага дня кампанія 350.org прымеркавала акцыю кнігаабмену
Апошняя нядзеля мела асаблівую дату: 10.10.10. Да гэтага дня кампанія 350.org прымеркавала акцыю кнігаабмену.
«Бук-кросінг 350+15 дзён у годзе» праводзіўся ў сусветны кліматычны дзень 10.10.10, ініцыяваны ў мэтах памяншэння вугляроднага следу, які пакідаюць людзі падчас жыццядзейнасці. На думку арганізатараў, каб зменшыць свой вугляродны след, дастаткова толькі змяніць свае звычкі. Кнігаабмен, напрыклад, дае магчымасць панізіць выкіды вуглякіслага газу і захаваць вялізную колькасць рэсурсаў — дрэваў, энергіі, вады — неабходных для стварэння абсалютна новай кнігі. Замест таго, каб пыліцца на паліцах, кнігі будуць пераходзіць з рук у рукі.
На выходных кнігамі можна было абменьвацца праз адмысловую шафу на Фестывалі нефармальнай адукацыі, які адбываўся ў Мінскім міжнародным адукацыйным цэнтры (IBB). Але 10 кастрычніка акцыя не заканчваецца. Д
ля папулярызацыі ідэяў бук-кросінга з 11 кастрычніка шафа для абмену кнігамі з’явілася ў Галерэі сучаснага мастацтва «Ў» (пр-т Незалежнасці, 37а). Кожны ахвочы зможа працягнуць кнігаабмен. Пакінуць кнігі ў Мінску можна таксама ў Цэнтральнай гарадской дзіцячай бібліятэцы (пр. Газеты «Праўда», 20), клубе «Графіці» (зав. Калініна, 16).
Упершыню пакінуў два дзесяткі кнігаў з тлумачальнымі пазнакамі ў гатэлі спецыяліст па інтэрнэт-тэхналогіях Рон Харнбэкер ў маі 2001 году. Кнігі прызначаліся для кожнага ахвочага пачытаць з умоваю працягнуць ланцуг перадачы. Такім чынам быў заснаваны кнігазварот з высокай мэтаю вызвалення кнігаў. Праз год сайт Рона меў некалькі соцень паслядоўнікаў. Да 2006 года у Еўропе бук-кросінг разгарнуўся як сапраўдны рух. Людзі пачалі пакідаць часопісы ды кнігі ў парках, транспарце. У Італіі, напрыклад, улады Фларэнцыі бязвыплатна прэзентавалі руху кнігаабмену 4 тысячы выданняў, якія распаўсюджваліся на рынках горада і ў будынку мэрыі.
Праўда, на прасторы былога СССР рух кнігазвароту сутыкнуўся з праблемаю — людзі бяруць кнігі, чытаюць ды не спяшаюцца перадаваць узятае іншаму.
У Беларусі зарэгістраваць кнігу і адпусціць, а вольны рух па рукам можна на сайце афіцыйны сайт буккросераў bооkсrоssіng.bу або mena.by. Кніга атрымлівае ўласны код, які наносіць на яе гаспадар. Існуе таксама міжнародны партал буккросераў bookcrossing.com
Амбіцыйная кампанія 10.10.10 заснаваная на простай ідэі зніжэння на 10% выкідаў вуглякіслага газу ў 2010 годзе. Сотні тысяч людзей па ўсім свеце рабілі 10 кастрычніка пэўныя крокі ў мэтах дасягнення больш здаровай планеты і клімату: усталёўвалі сонечныя батарэі, уцяплялі дамы, саджалі дрэвы.
Праз тыдзень мы сустрэнем люстэркавую дату — 20.10 2010. Гэты дзень будзе адметным для астраномаў: камета Хартлі-2 наблізіцца на мінімальную за апошнія некалькі стагоддзяў да Зямлі адлегласць — 17,7 млн кіламетраў. А праз два гады чалавецтва дачакаецца абсалютнага паўтарэння падобнага дня — 12.12.12. Ці будуць эколагі дамагацца 12% зніжэння выкідаў вуглякіслага газу ў 2012 годзе, пакуль невядома.
