Букера-2010 атрымаў Говард Джэйкабсан

Прэстыжную літаратурную прэмію Букера за найлепшую кнігу 2010 года атрымаў Говард Джэйкабсан за сатырычны раман «Праблема Фінклера».

Джэйкабсан апярэдзіў іншых удзельнікаў конкурсу, у тым ліку двойчы лаўрэата Букера Пітэра Кэры. Ён атрымаў чэк на 50 тысяч фунтаў стэрлінгаў (каля 75 тысяч даляраў) на цырымоніі, што прайшла ў лонданскім Сіці. Апроч таго, усім фіналістам, уключаючы пераможцу, уручаецца чэк на 2,5 тысячы фунтаў.

Старшыня журы сэр Эндру Моўшн назваў кнігу 68-гадовага пісьменніка «вельмі смешнай, але пры гэтым вельмі разумнай, вельмі сумнай і вельмі тонкай».

У цэнтры рамана — тэма самаідэнтыфікацыі яўрэяў у сучасным брытанскім грамадстве. Кніга — пра чалавечыя адносіных, сяброўства непадобных адзін на другога школьных таварышаў, двое з якіх з’яўляюцца яўрэямі, а трэці хоча ім быць, — стала першым адкрыта гумарыстычным творам, якія атрымалі Букера за ўсю гісторыю прэміі.

Гэта 11-ы па ліку раман Джэйкабсана. У цэнтры яго — постаць былога радыёпрадзюсара Бі-бі-сі Джуліяна Трэслава, якога збіваюць па дарозе дадому пасля вячэры з сябрамі. Пасля гэтага нападу яго разуменне сябе і сваёй ідэнтычнасці пачынае мяняцца.

Бі-Бі-Сі

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ