"Прэзыдэнт адкінуў чуткі пра сваю сур'ёзную хваробу". Магчыма, у гэтым загалоўку БЕЛТА адлюстравана звышзадача сёньняшняй паездкі афіцыйнага кіраўніка па сталічным раёне.
З камэнтару Аляксандра Лукашэнкі вынікае: ён адсачыў рэакцыю сеціва на сваю доўгую адсутнасьць у тэлевізійных рэпартажах. І вось сёньня адказаў у духу вядомага анэкдоту: не дачакаецеся!
Яшчэ адзін блёк заяваў фактычна ёсьць адказам на ліст Мілінкевіча і заклікі дэмакратычнае грамадзкасьці разам адсьвяткаваць Дзень Волі. Заяўлена, што кіраўнік дзяржавы не зьбіраецца абараняць свае ідэі на плошчах. А за моладзь, маўляў, трэба змагацца на вытворчасьці.
Увогуле ж апазыцыя і Захад атрымалі даволі экспрэсыўны адказ на свае пасажы аб дыялёгу. "Краіну мы ім не аддамо", — цытуе "Інтэрфакс". І канкрэтна: "...у пысу надаем таму, хто адважыцца згарнуць той працэс, што ідзе ў краіне". Плюс паабяцана разабрацца з пазыцыяй амбасадараў, што назіралі 25 сакавіка за маніфэстацыяй.
Аднак адсутнасьць на гэты момант (дай бог і надалей!) рэпрэсіяў ў дачыненьні да арганізатараў Дня Волі дазваляе зрабіць дапушчэньне, што ўчыняць паказальны разбор палётаў наверсе ня надта настроеныя. Хутчэй што сёньняшняя мэталёвая рыторыка працуе на падмацаваньне іміджу моцнага лідэра.
Лукашэнка кажа, што ня бачыць патрэбы мяняць тактыку стасункаў з апазыцыяй. Разам з тым, зь ягоных слоў вынікае, што імпрэзы ля бібліятэкі і ў аэрапорце 25 сакавіка былі замаскаваным жэстам кансалідацыі: "Лепшыя пляцоўкі ім аддалі" (!).
І яшчэ адзін фармальны алягізм. Калі афіцыйна трактуецца, што 25-га пад бел-чырвона-белымі сьцягамі хадзіла нікчэмная купка, то нашто надаваць падзеі столькі ўвагі на ўзроўні першай асобы дзяржавы?
Выглядае на тое, што насамрэч праблема дачыненьняў з прадэмакратычнай часткай грамадзтва і Захадам клапоціць афіцыйнага кіраўніка дастаткова сур'ёзна.
Зрэшты, гэтыя ўражаньні навеяныя фрагмэнтарнымі на цяперашні момант мэдыйнымі паведамленьнямі пра наведваньне Менскага раёну.
Пра акцэнты, нюансы і кантэксты даведаемся з "Панарамы" :)
