Літоўскі EPAM Sistemos апавясціў кіраўніцтва ЕГУ, што спыняе партнёрства па праекце EPAM School of Digital Engineering (ESDE). Праект быў запушчаны ў 2022 годзе і праіснаваў менш за два гады. Студэнтам прапанавалі працягнуць навучанне ў ЕГУ на спецыяльнасці «Інфарматыка», узяць акадэмічны адпачынак або перайсці ў іншыя ВНУ.
ESDE — эксперыментальнае падраздзяленне EPAM для падрыхтоўкі бакалаўраў і магістраў у партнёрстве з універсітэтамі. Напрыклад, у Кіеве такі праект рэалізуецца ў AUK (Амерыканскі ўніверсітэт), у Ташкенце — у IT-Park University (лічбавы ўніверсітэт, створаны ІТ-паркам Узбекістана сумесна з EPAM). На дадзены момант няма інфармацыі, што іншыя праекты (ці нейкія з іх) пад пагрозай.
У праграме ЕГУ — тры спецыялізацыі на выбар, якія паглыблена вывучаюцца на працягу чатырох семестраў: Java EE;.Net; JavaScript/TypeScript. Акрамя спецыялізацыі ў праграму ўключаныя прадметы, якія дапамогуць развіваць soft skills і атрымліваць практычныя кампетэнцыі.
Кар’ерныя магчымасці пасля заканчэння навучання:
- Full-stack, Front-end і back-end распрацоўшчык (спецыялізацыі — Java EE,.Net, JS & TypeScript);
- тэсціроўшчык і спецыяліст па забеспячэнні якасці;
- праекціроўшчык праграмнага забеспячэння, UX-дызайнер, распрацоўшчык мабільных праграм;
- менеджар ІТ-праектаў.
Прычыны ў сакрэце
ЕГУ і EPAM не сталі каментаваць, чаму прынятая такая пастанова. Студэнты, з якімі ўдалося пагутарыць dev.by, таксама нічога не ведаюць пра прычыны. «Спрабаваў даведацца, але ні той, ні другі бок нічога не кажа. Сказалі толькі, што ў EPAM «комплексная прычына».
Колькі студэнтаў вучылася на ESDE
Усяго на праекце, паводле ацэнак суразмоўцаў, вучыцца больш за 300 чалавек: на першым курсе каля 120 чалавек (вочнае + завочнае), на другім курсе каля 200 чалавек.
Колькі студэнтаў ESDE у выніку застанецца ў ЕГУ — невядома.
Рэакцыя студэнтаў
Рашэнне EPAM стала нечаканым для студэнтаў. Адзін з суразмоўцаў лічыць, што кампанія «паступіла непрыгожа».
— Некаторыя ўспрынялі сітуацыю такім чынам, што EPAM проста пагуляўся са студэнтамі і кінуў. Да гэтага здарылася затрымка з грантамі на навучанне, — выказаў меркаванне адзін са студэнтаў.
Паводле слоў суразмоўцаў, большая частка студэнтаў пакуль вырашыла працягнуць навучанне. Але частка збіраецца ў іншыя ВНУ. Некаторыя разглядаюць опцыю пераезду ў Польшчу.
— Напэўна, буду пераводзіцца ў іншы ўніверсітэт, магчыма нават не ў Літве. Мне здаецца, калі зменіцца выкладчыцкі склад і зменіцца праграма, будзе не тая якасць адукацыі, — падзялілася планамі адна са студэнтак.
Кошт ESDE як плюс
Адна з альтэрнатыў EPAM School of Digital Engineering (ESDE) у Літве — Vilnius Tech (Віленскі тэхнічны ўніверсітэт). Але студэнты асцерагаюцца складанасцяў праз розніцу ў сістэме ацэнкі ведаў, да таго ж кошт навучання ў Vilnius Tech «мінімум у два разы большы».
Асаблівасць вучобы ў ЕГУ па праграме EPAM School of Digital Engineering у тым, што плата для студэнтаў — фіксаваная на ўвесь тэрмін навучання, не пераглядаецца штогод для тых, хто ўжо паступіў, кажуць студэнты.
Напрыклад, для студэнтаў, якія пачалі навучанне на праекце ў 2022 годзе, плата на працягу ўсяго тэрміну навучання (3,5-4,5 гады) складае 1600 еўра (вочнае навучанне) і 1100 еўра (завочнае) на семестр. Тыя, хто паступіў у 2023 годзе, плацяць 1760 еўра (вочнае навучанне) і 1210 еўра (завочнае). Для тых, хто паступае сёлета кошт вочнага навучання складзе 1800 еўра, завочнага — 1250 еўра на семестр.
Былі яшчэ і гранты EPAM (але ёсць нюансы)
Яшчэ адна асаблівасць праекта — гранты на навучанне ад EPAM. Іх размяркоўвалі па паспяховасці, расказваюць студэнты. «Найлепшыя 10% студэнтаў атрымлівалі 100% грант (зніжку на навучанне на семестр), наступныя за імі 15% атрымлівалі 50% грант».
Што праўда, паводле слоў студэнтаў, інфармацыі пра гранты на бягучы семестр (па выніках папярэдняга) дагэтуль няма.
На думку аднаго з суразмоўцаў, у сыходзе EPAM нават з’яўляюцца свае плюсы, калі казаць пра гранты.
— Студэнты інфарматыкі не маглі ўдзельнічаць у многіх ініцыятывах ЕГУ. Напрыклад, атрымліваць гранты на праекты або стыпендыі за даследчую дзейнасць або выдатную вучобу. З сыходам EPAM магчымасцяў стане больш.
Стажыроўкі цяпер — на агульных падставах
Паводле слоў аднаго са студэнтаў, «першапачаткова меркавалася, што стажыроўкі могуць быць у EPAM або ў іншых кампаніях па жаданні. Цяпер гарантаваныя стажыроўкі ў EPAM скасавалі. Але можна падавацца на стажыроўку ў кампанію на агульных падставах».
Суб’ектыўныя плюсы і мінусы
Папрасілі студэнтаў абагульніць уражанні ад праграмы.
Плюсы:
- «Гнуткі фармат, звычайна не больш за 2-3 пары на дзень, можна сумяшчаць з працай».
- «Практыкаарыентаванасць, няма тон вышэйшай матэматыкі, усё ў меру».
- «Пастаянныя івэнты ад офіса інфарматыкі (вечары настольных гульняў, кінаклубы, speaking clubs)».
- «Прыемныя выкладчыкі з прадакшан-досведам і «слупы» айці-індустрыі ў Беларусі».
- «Ёсць анлайн-класы, усе заняткі праходзяць па зуме з любога пункта свету. У іншых універсітэтах такога няма».
- «Ёсць добрыя аўтарскія курсы».
Мінусы:
- «Недахопы арганізацыі. Напрыклад, пары могуць перанесці без папярэджання».
- «Нізкі прахадны бал некалькі зніжае сярэднюю паспяховасць і матываванасць груп. На першым курсе поўна маладзёнаў з сярэднім балам 7 і з баламі па ЦТ меншымі за 60. Многія наогул не разумеюць, што яны тут робяць».
- «Няма падзелу на вучняў з ведамі і без. Па выніку пакутуюць і адныя, і другія».
- «Ёсць вельмі сырыя праграмы, такія як Digital Technologies. У першым семестры лабараторныя работы трэба рабіць у Excel і ніяк інакш, гэта ўжо стала ўнутраным мемам».
- «Некаторыя прадметы — гэта бясплатныя анлайн-курсы з дадатковымі хатнімі заданнямі».
Што будзе далей
Кіраўніцтва ўніверсітэта прапанавала студэнтам працягнуць навучанне ў ЕГУ на спецыяльнасці «Інфарматыка» ў новым рэарганізаваным філіяле — School of Digital Competences. Пры гэтым кіраўніцтва ЕГУ сцвярджае, што рэарганізацыя не закране навучальнага працэсу: ніякіх кардынальных перамен не будзе.
Таксама студэнтам паведамілі, што большасць выкладчыкаў, якія былі задзейнічаныя ў праекце EPAM, застануцца ў ЕГУ.
— Частка выкладчыкаў ужо даўно не працуе ў EPAM і таму сыход кампаніі з праекта не мае на іх паўплываць. Калі што, сказалі, будуць шукаць замену. Дададуцца супрацоўнікі іншых кампаній. Да канца семестра, здаецца, ніякіх змен у выкладчыцкім складзе не прадбачыцца, — расказаў адзін з суразмоўцаў.
Яшчэ адзін суразмоўца звярнуў увагу на тое, што брэнд EPAM у назве праекта быў добрым прадавальным фактарам. З сыходам кампаніі «ўрон быў нанесены па маркетынгавым складніку».
— Але я думаю, што школа знойдзе нейкі новы туз у рукаве, які зацікавіць абітурыентаў і будучых студэнтаў.
Паводле слоў суразмоўцы, у сыходзе EPAM з праекта ў ЕГУ ёсць і свае плюсы.
— У нас з’явілася больш свабоды, знятыя многія карпаратыўныя абмежаванні. Напрыклад, мы зможам прыцягваць больш інвестыцый у школу, актыўней весці маркетынг, а таксама запрашаць выкладчыкаў не толькі з EPAM. Раней гэта было магчыма, але многія выкладчыкі, якія працуюць у кампаніях-канкурэнтах EPAM, турбаваліся, што іх начальства можа не зразумець такіх сувязяў. Цяпер гэтая праблема знятая.
Чытайце таксама:
Загінуў супрацоўнік ЕГУ Вадзім Хлебародаў, яму было 36 гадоў
Рэктар ЕГУ пракаментаваў інфармацыю пра магчымае прызнанне ўніверсітэта «экстрэмісцкім»
