19 снежня 2007 года ў Міністэрстве фінансаў Беларусі прайшла дзяржрэгістрацыя змяненняў акцыянераў ЗАТ «Страхавая кампанія «АльВеНа».
На думку С.Саркісава, у Беларусі вельмі спрыяльныя перспектывы развіцця страхавога рынку. «Мы лічым, што на сённяшні дзень страхаванне ў Беларусі ў лепшым выпадку асвоена працэнтаў на 12—15. Гэта значыць, ёсць яшчэ вельмі значныя магчымасці для росту. Вельмі верым, што гэты бізнес лібералізуецца, і прыватныя кампаніі будуць дапушчаны да абавязковых відаў страхавання», — зазначыў С.Саркісаў.
Фінансавыя падрабязнасці старшыня савета дырэктараў расійскай групы «РЕСО» паведамляць не стаў. «РЕСО‑Гарантыя» не публічная кампанія, і куплялі мы актыў таксама не ў публічных кампаній, таму параметры здзелкі не раскрываюцца і з’яўляюцца камерцыйнай тайнай», — зазначыў С.Саркісаў.
Ён нагадаў, што ў групу «РЕСО» ўжо ўваходзіць беларускае ЗСАТ «Бролі». «Мы вырашылі выводзіць брэнд «РЕСО» на рынак Беларусі, каб кансалідаваць пад эгідай «РЕСО» два нашыя актывы, «Бролі» і «АльВеНа». Таму іх назвы будуць гучаць «Бролі — Група РЕСО» і «АльВеНа — Група РЕСО», — паведаміў С.Саркісаў.
Чакаецца, што доля кампаній «АльВеНа» і «Бролі», якія належаць расійскай групе «РЕСО», на страхавым рынку Беларусі да канца 2008 года павялічыцца з цяперашніх 7,5 % да 12,5 %.
Кампанія «АльВеНа» працуе на страхавым рынку Беларусі з 1991 года і з’яўляецца адной з вядучых страхавых кампаній рэспублікі.
* * *
«Бролі» і «АльВеНа» — найбуйнейшыя прыватныя страхавыя кампаніі Беларусі.
«РЕСО‑Гарантыя» — універсальная страхавая кампанія, што займае лідзіруючыя пазіцыі на расійскім рынку страхавых паслуг. Створана ў 1991 годзе. Кампанія ўваходзіць у групу «РЕСО» — дыверсіфікаваны холдынг, які мае актывы не толькі ў галіне страхавання (у тым ліку ў краінах СНГ), але і ў галінах медыцынскага абслугоўвання, лізінгу, дэвелапмента і кіравання актывамі.