НОС ДЗЕДА МАРОЗА
На дварэ марозны ранак.
Хлопчык выскачыў на ганак:
— Пакажыся, Дзед Мароз,
Дай зірнуць мне на твой нос.
Ці ён сіні, ці зялёны,
Ці ён чорны, ці чырвоны?
Я цябе намаляваў,
Толькі нос не фарбаваў.
Двор Якубка абабег.
«Дзе ж той Дзед?» —
Навокал сьнег.
«Дзе Мароз той?» —
Невядома.
Зьмерз Якуб, пабег дадому.
Глянуў хлопчык у люстэрка:
— Дзе аловак, дзе паперка!
Зараз, зараз, Дзед Мароз,
Пафарбую я твой нос.
ЗІМА
Сёньня першы дзень зімы.
І сьняжынкі ловім мы.
А сьняжынкі — жартаўніцы:
На руках адна вадзіца.
ПЕРАД НОВЫМ ГОДАМ
Лыжы мчацца.
Што за крос?
Гэта едзе Дзед Мароз.
Дзед ляціць, як чэмпіён,
Бо сьпяшае ў краму ён.
Купіць футра там другое:
Закароткае старое.
Шапку, шалік, рукавіцы
Абнавіў Дзед у хімчыстцы.
Барада ў яго да пят —
Так ня пойдзеш у дзетсад.
У цырульню едзе Дзед —
Падстрыгуць яго як сьлед.
Дзыннн! — будзільніка сыгналы.
Едзе Новы год з вакзалу.
Дзед Мароз надзеў абновы —
Новы год страчаць гатовы.
І на ранішнік якраз
Прыйдзе Дзед Мароз да нас.