U Minsku źjaviŭsia pieršy fotakijosk — fotafakt 7

U handlovym centry «Zamak» na praśpiekcie Pieramožcaŭ zapracavaŭ pieršy ŭ horadzie fotakijosk «Micubisi». Z vyhladu jon nahadvaje bankamat, ale vydaje nie hrošy, a zdymki.

Pryncyp pracy prosty. Spačatku klijent ustaŭlaje ŭ aparat fłešku, dysk, kartku pamiaci ci navat skidvaje zdymki pa Bluetooth. Raspracoŭščyki davodziać, što fotakijosk pracuje z 18 vidami nośbitaŭ.

Zdymki, jakija adlustrujucca na 17-calevym manitory, možna adredahavać aŭtamatyčna, a možna padpravić samomu. Ekran siensarny, tamu daviadziecca papracavać palcami.

Z dapamohaj ustalavanych prahram z fotaŭ možna stvaryć kalandar ci knihu, a paśla adpravić ich na druk — fotapryntar znachodzicca ŭ samim kijosku.

Sabiekošt zdymku 10×15 sm składaje 1450 rubloŭ. Karystalniki siervisu zapłaciać za jaho 2490 rubloŭ.

Zdymak pamieram 15×20 sm budzie kaštavać 5700 rubloŭ pry sabiekošcie 4400 rubloŭ. Ceny pryblizna takija ž, jak u zvyčajnych fotacentrach. Naprykład, u papularnym «Ałoŭku» na płoščy Niezaležnaści maleńkaje fota kaštuje 2500, a bolšaje — 4800 rubloŭ.

Za 20-staronkavy kalandar u fotakijosku daviadziecca zapłacić ad 59 000 rubloŭ. Za fotaknihu — ad 138 tysiač rubloŭ.

U pieršyja dni pracy kijoska kala jaho stajali pramoŭtary. Pa ich słovach, absłuhoŭvańnie aparata tannaje — dastatkova tolki mianiać fotapapieru. Zrešty, čerhaŭ z achvotnych razdrukavać svaje foty pakul niabačna.

Na Zachadzie takija aparaty karystajucca vialikaj papularnaściu — ludzi nie chočuć, kab niechta bačyŭ ich asabistyja foty, tamu nie iduć u fotałabaratoryi.

U internet-katałohach takija aparaty pradajucca pa 6250 jeŭra.

Jahor Marcinovič

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH