Materyjał ab špijonach byŭ pakazany ŭ niadzielnaj teleprahramie «Kontury» na ANT. Miž inšym, jon išoŭ u siaredzinie prahramy paśla siužetaŭ pra naviedvańnie Łukašenkam Žłobina, jahonaha interviju «Mond», materyjała pra padatkavaje zakanadaŭstva.
U interviju karespandentu ANT namieśnik staršyni KDB Biełarusi Valer Viahiera raskazaŭ pra raskryćcio sietki polskich špijonaŭ: čatyroch hramadzianaŭ Biełarusi i adnaho Rasiei — užo byłych vajskoŭcaŭ. Hetyja ludzi źbirali infarmacyju pra sumiesnuju systemu supraćpavietranaj abarony Biełarusi i Rasiei.
«Poŭnaściu dakazana špijonskaja dziejnaść. Ja chaču asabliva padkreślić, što svoječasovymi dziejańniami kontarraźviedki ŭronu abaronazdolnaści Respubliki Biełaruś i Rasijskaj Fiederacyi nie dapuščana», — cytuje słovy V. Viahiery infarmacyjnaja kampanija BiełaPAN.
Fabuła špijonskaj kampanii nastupnaja. Aŭtamabil adnaho z zatrymanych Valera Ruskina (Russkina) padčas jaho vajažu ŭ Polšču spynili polskija mytniki: kolkaść alkaholu pieravyšała dazvolenuju ŭ piać razoŭ. Sp‑ru Ruskinu prapanavali vybar: abo departacyja abo praca na specsłužby. Sp. Ruskin abraŭ druhi varyjant i nieŭzabavie stvaryŭ ahienturnuju sietku z čatyroch čałaviek. Jon zavierbavaŭ načalnika raźviedki adnoj z zenitna‑rakietnych bryhadaŭ Biełarusi Viktara Bohdana, vajennasłužačych radyjotechničnaj bryhady vojsk SPA Karnieluka i Piatkieviča, majora ŭzbrojenych sił Rasiei Jureniu.
Usie hetyja asoby źbirali źviestki i fatahrafavali abjekty sumiesnaj supraćrakietnaj abarony Biełarusi i Rasiei. Potym infarmacyja zapisvałasia na fłeš‑karty ci inšyja nośbity infarmacyi i ŭ roznyja sposaby pieradavałasia na inšy bok miažy. Naprykład, jak było skazana, pieravoziłasia ŭ aŭtamabili, schavanaja ŭ ahnietušyciel.
Dokazami stali videamateryjały aperatyŭnych i śledčych dziejańniaŭ, ź jakich jasna, što fihurantaŭ niekatory čas «viali». U dačynieńni da ŭsich fihurantaŭ śledčym upraŭleńniem KDB zaviedzienyja kryminalnyja spravy na padstavie art. 356‑1 KK (zdrada dziaržavie ŭ formie špijanažu), što praduhledžvaje ad 7 da 15 hadoŭ pazbaŭleńnia voli.
Viktar Bohdan byŭ zatrymany naŭprost na pracoŭnym miescy, dvoje fihurantaŭ spravy na vulicy pry vychadzie z aŭtamabila. Sp. Jurenia pavinien źjavicca z pavinnaj u FSB Rasiei.
Niekatoryja zatrymańni prajšli 5 studzienia: heta bačna z teletekstu aperatyŭnaj zdymki. Miž inšym, u hety dzień byŭ aryštavany biełaruska‑rasiejski šansańje Viktar Kalina.
Ciapier śledztva skončana, i sprava pieradadziena ŭ sud.
***
Što staić za hetymi zatrymańniami? «Salidarnaść» vysunuła try versii. Pieršaja: žadańnie nasalić Rasiei, pakolki siarod zatrymanych jość hramadzianin susiedniaj krainy. Ale hetaja versija padajecca małavierahodnaj, pakolki apošnim časam Biełaruś robić usio mahčymaje, kab atrymać rasiejski kredyt, i niama sensu abvastrać dačynieńni z uschodnim susiedam.
Versija druhaja: pakazać siabie pierad Rasiejaj ŭ najlepšym śviatle. Maŭlaŭ, biełaruskija specsłužby stajać na varcie abarony sumiesnych intaresaŭ dvuch krain.
Versija treciaja: žadańnie nasalić Polščy i pomsta za Siarhieja Moniča, zatrymanaha ŭ Litvie ŭ listapadzie 2006 h. i jakoha potym ekstradziravali ŭ Polšču.
Pasolstva Respubliki Polšča ŭ Respublicy Biełaruś zajaviła, što ambasada nia budzie kamentavać infarmacyi pra špijonaŭ. Pra heta BiełaPAN zajaviła pradstaŭnik polskaj dypmisii ŭ Minsku Monika Sadkoŭska.
Tym časam maskoŭskaha karespandenta «Gazety Wyborczej» Vacłava Radzivinoviča biełaruskija pamiežniki vysadzili ź ciahnika da Maskvy i nie dazvolili jamu prajechać praz terytoryju Biełarusi. U kamentary Radyjo Svabodzie sp‑r Radzivinovič zajaviŭ, što jahonyja dakumenty ŭ paradku, ale jamu skazali, što «biełaruskaja dziaržava raić jamu jechać u Rasieju albo samalotam, albo praz Ukrainu».
Jak paviedamili BiełaPAN u Viarchoŭnym sudzie, kryminalnaja sprava ŭ dačynieńni da abvinavačanych ŭ špijanažy hramadzian pakul nie pastupała ni ŭ Biełaruski vajenny sud, ni ŭ Vajennuju kalehiju Viarchoŭnaha suda.
Pakazany pa ANT siužet pakidaje ŭražańnie teatralnaści. Valer Ruskin pry kancy siužetu ledź patasna zajaŭlaje, što pamyliŭsia, raskaŭsia i hatovy panieści žorstkaje pakarańnie zhodna z zakonami krainy. Jość niejkaja teatralnaść była ŭ zatrymańni na pracoŭnym miescy sp. Bohdana. Siužet ANT skančajecca tym, što Ruskina zavodziać u turemnuju kletku ŭ zali suda. Ale sud, zdajecca, jašče nie pačaŭsia.
