Racyja paprasiła prakamientavać biełaruska‑rasijska‑polski špijonski skandał hałoŭnaha redaktara polskaha vydańnia «Rzeczpospolita» Piatra Kaścinskaha, vajennaha ekśpierta Alaksandra Alesina, palitołaha Andreja Suzdalcava i Maryjuša Maškieviča, daradcu polskaha premjera pa ŭschodnich pytańniach.
Piotr Kaścinski adznačaje nadta sumnieŭny momant u źviazku z adnym ź fihurantaŭ spravy. Były major Uzbrojenych siłaŭ Biełarusi Uładzimier Ruskin pryznaŭsia ŭ niadzielnym teleefiry kanała ANT, što pahadziŭsia na supracu padčas pajezdki ŭ Polšču. Nibyta palaki abiacali nie zvažać na toje, što jon viazie zašmat ałkaholu, kali biełarus voźmiecca špijonić na ich karyść:
‑ Ciažka skazać, na čyim baku tut praŭda, miž susiednimi dziaržavami moža być usialakaje. Adnak jość u hetaj spravie niekalki sumnieŭnych momantaŭ. Najpierš dzivić, što major, što słužyŭ u biełaruskich Uzbrojenych siłach zajmaŭsia kantrabandaj, a polski bok skarystaŭ heta, kab jaho šantažavać. Mnie ciažka takoje ŭjavić…
Palitołah Andrej Suzdalcaŭ, jaki ŭvachodzić u biełaruska‑rasijskuju pravaabarončuju kamisiju pry prezidencie Rasii stavić pad sumnieŭ inšy fakt u hetaj historyi. Pa ahučanaj infarmacyi, adzin ź fihurantaŭ spravy major Uzbrojenych sił Rasii Jurenia źjaviŭsia z pavinnaj u Fiederalnuju słužbu biaśpieki Rasii. Dy i naohuł Andrej Suzdalcaŭ nazyvaje hetuju spravu vielmi sumnieŭnaj:
‑ U Rasii takija fakty adrazu ž nabyvajuć rozhałas. Voś niadaŭna pakajalisia dva čałavieki, zavierbavanyja anhielskaj vyviedkaj. Infarmacyi pra toje, što niechta zdaŭsia i abviaściŭ siabie ahientam polskaj vyviedki ŭ Maskvie niama, ja vas zaŭpeŭnivaju. U Biełarusi niama sensu špijonić, bo ŭsio nastolki prazrysta i viadoma. Miarkuju, što heta sprava źviazana z tym, kab prademanstravać, što KDB, jakoje zaraz znachodzicca ŭ ciažkim stanoviščy, trymaje ruku na pulsie i praciahvaje aktyŭna abaraniać intaresy dziaržavy.
Redaktar «Rzeczpospolita» Piotr Kaścinski miarkuje, što padstavaŭ dziela arhanizacyi «špijonskaha skandału» biełarusy mahli mieć niamała:
— Pa‑pieršaje, heta mahło być adkazam na spravu biełaruskaha špijona, jaki byŭ zatrymany letaś u Litvie i vinavaciŭsia ŭ špijanažy suprać Polščy. Moža być, źviazana ź sistemaj supraćrakietnaj abarony, što ŭsio ž źjavicca ŭ Polščy. Ci, narešcie, heta mohuć być razborki ŭ samich biełaruskich śpiecsłužbach.
Vajenny ekśpiert Alaksandr Alesin adznačyŭ u interviju Racyi, što dzivić nie toj fakt, što špiehavali, ale toje, što hetaj spravie była nadadziena takaja publičnaść:
‑ Całkam vierahodna, što sapraŭdy znajšli sapraŭdnych špijonaŭ. Naturalna, što vajennyja vyviedki namahajucca daznacca pra roznyja tajamnicy. Ale ŭsie razumiejuć, što supraćlehły bok pavinien sabrać infarmacyju, kab upeŭnicca, što tut nie majuć anijakich varožych zadumaŭ. Adnak pracujuć mižsobku jany zaŭždy cicha. Tamu i padajecca dziŭnym toje, što hety fakt byŭ publična ahučany. Mnie padajecca, što heta palityčny demarš.
Daradca polskaha premjera‑ministra Jarasłava Kačynskaha pa ŭschodnich pytańniach Maryjuš Maškievič u interviju Racyi skazaŭ, što ŭžo daŭno nie dzivicca padobnym krokam ź biełaruskaha boku. Ź jaho słoŭ, polskija ŭłady nie źbirajucca anijak reahavać aficyjna na telezajavu biełaruskich śpiecsłužboŭcaŭ:
‑ Ja asabista ŭspryniaŭ hety siužet, jak čarhovy prapahandyscki krok biełaruskich uładaŭ. Padajecca, što biełarusaŭ chočuć zapužać, kab jany naohuł z zamiežnikami nie kantaktavali. Dziŭnaha tut ničoha niama, ale heta śmiešna i strašna. Śmiešna, bo nahadała pieśniu, što vykonvała Kasia Kamockaja pra dvuch polskich špijonaŭ — Boleka i Loleka. A strašna toje, što ŭ 30‑ch hh. ludziej zabivali za toje, što jany byli polskimi špijonami. Takich «polskich špijonaŭ» u Kurapatach — dziesiatki tysiačaŭ.
Siarhiej Budkin, Radyjo Racyja
