 |
Hubernatar štatu San‑Paŭłu zajaviŭ, što znajści kaho‑niebudź sa 170 pasažyraŭ i šaści členaŭ ekipažu žyvymi, šancaŭ praktyčna niama. Pradstaŭnik pažarnaj słužby paviedamiŭ, što aproč pasažyraŭ, zahinuli šmat ludziej na ziamli, bo samalot urezaŭsia ŭ hruzavy anhar.
Prezydent Brazylii Luiš Inasiu Łuła da Siłva abvieściŭ u krainie trochdzionnuju žałobu.
Samalot Airbus A320 avijakampanii TAM, miarkujecca, nia zdoleŭ zatarmazić na pasadačnaj pałasie z‑za mocnaha daždžu, što išoŭ nie spyniajučysia dźvie hadziny pierad prylotam.
Samalot kiravaŭsia z horadu Portu‑Alehry na poŭdni krainy. U 18:50 pavodle miascovaha času (00:50 pavodle mienskaha) lajner ździejśniŭ pasadku na asnoŭnaj pałasie aeraportu, ale nia zdoleŭ zatarmazić. Litaralna praśliznuŭšy praz ažyŭlenuju darohu ŭ žyłym kvartale, samalot urezaŭsia ŭ anhar, dzie zachoŭvajecca nievialiki zapas avijapaliva.
Letaś inšy pasažyrski lajner sutyknuŭsia ź nievialikim pryvatnym samalotam nad Amazonkaj. Na toj čas heta była najbujniejšaja katastrofa ŭ historyi Brazylii. Tady zahinuli 154 čałavieki.
Prezydent Biełarusi nakiravaŭ brazylskamu kalehu spačuvańni z pryčyny trahiedyi.
