Pakul palityzavanyja naveli kryminalnaha zakanadaŭstva nie nabyli mocy, teza pra «dyskredytacyju Respubliki Biełarusi» napoŭnicu skarystoŭvajecca ŭ palemičnym pinh-ponhu.
Apazycyjanery spaborničajuć u žartach, na jaki termin źniavoleńnia nahavaryli pierad zamiežnikami. Sapraŭdy, potym, jak na zakon lahuć usie vizy, budzie nie da žartaŭ.
Najpierš ža apanenty ŭłady pastavili rubam rytaryčnaje dla ich pytańnie: a ci nie palityka viarchoŭ dyskredytuje krainu ŭ vačoch cyvilizavanaj supolnaści?
...Uvosień mnie daviałosia hutaryć z šeraham upłyvovych litoŭskich palitykaŭ, što zaklikali, kažučy sproščana, ułahodzić aficyjny Miensk piernikam. Siarod ich, naprykład, eŭradeputat Justas Paleckis. A najbolšym entuzijastam vyhladaŭ naš ziamlak z-pad Smurhoniaŭ — siabar Sojmu Vacłaŭ Stankievič.
Jany davodzili, što Vilni — dyj Eŭropie ŭvohule (da Vašynhtonu apielavać niama sensu, tam daŭno adkinuli takija iluzii) — varta darešty skarystać šaniec na dyjaloh ź ciapierašnimi biełaruskimi ŭładami. I spakvala schilić ich da źmiakčeńnia ŭnutranaj sytuacyi.
Litva (zacikaŭlenaja, kab ros biełaruski tranzyt praz Kłajpedu) navat ryzyknuła. Pamiatajecie, jak u kastryčniku premjera Sidorskaha niečakana pryniaŭ kaleha Brazaŭskas? Na tle eŭraźviazaŭskaj «palityki abmiežavanych kantaktaŭ» heta była sensacyja.
Siońnia ž, paśla słavutych «papravak KDB» (dy kaskadu inšych zachadaŭ suprać apazycyi, medyjaŭ, hramadzianskaje supolnaści), z prychilnikaŭ piernika kpiać tyja, chto ad pačatku byŭ za bizun. Nu što, maŭlaŭ, pakaštavali dulu z makam?
I voś užo litoŭski prezydent Adamkus prymaje apazycyjnaha lidera Milinkieviča.
Dyk što ž, takim čynam, bačym?
Inicyjatary papravak ščyravali, kab apazycyja nie damahłasia sankcyjaŭ dy inšaj trascy. Ale ŭ vyniku aficyjny Miensk ryzykuje sam naklikać niepryjemnaści. Adnym faktam uviadzieńnia represiŭnych navelaŭ. Užo nia kažučy pra ŭžyvańnie.
I čym bolej tut zatykajuć hłotku apanentam ułady, tym praściej tam stavić palityčny dyjahnaz. Navat kali «ŭnutranym oraham» pazašyvać raty, Zachad nie paličyć, što ŭ Biełarusi ŭsio o'kiej.
Kolki tydniaŭ tamu padčas hutarki ŭ Bruseli ja zaŭvažyŭ, što vice-staršynia Eŭraparlamentu Januš Anyškievič mižvoli paciraje zapiaści, raspaviadajučy, jak za kamunistyčnym časam jaho zakoŭvali ŭ kajdanki. Dyk chiba hety veteran «Salidarnaści» nie zrazumieje biaz doŭhich tłumačeńniaŭ, što robicca ŭ siońniašniaj Biełarusi?
Nu a eŭradeputaty z krainaŭ Bałtyi vydatna pamiatajuć damokłaŭ mieč časoŭ SSSR — artykuł «Antysavieckaja ahitacyja i prapahanda».
Najchutčej, mienavita pradstaŭniki susiednich krainaŭ praz Eŭraparlament uzmocniać cisk na inšyja struktury Eŭrapiejskaha źviazu dziela vypracoŭki bolej suvoraj u dačynieńni da aficyjnaha Miensku palityki.
Tym bolej što ŭ Varšavie, naprykład, jašče raniej apiaklisia na sprobach ustalavać niejkija asablivyja, bolej łahodnyja stasunki ź biełaruskimi ŭładami. Chacieli, jak toj kaža, pa-susiedzku. Ale atrymali smačnuju aplavuchu ŭ vyhladzie historyi sa Źviazam palakaŭ.
Kijevu taksama nie pad nos peryjadyčnyja zakidy z boku biełaruskich viarchoŭ. Dyj areoł Majdanu vymušaje paćviardžać addanaść ideałam demakratyi. Hałoŭnaje ž — nie ŭ patetyčnych klatvach, a ŭ prahmatyčnych čyńnikach. Ukrainski dabrabyt budzie zaraz naŭprost zaležać ad zbližeńnia z supolnaściu zachodnich krainaŭ.
Naturalna, urad Juščanki namahajecca zachoŭvać peŭny palites u dačynieńniach ź Mienskam, zvažajučy na šalony rost tavarazvarotu (dy jašče pry «padviešanaj» biełaruskim bokam damovie pra miažu).
Ale razam z tym — atrymajcie-raśpišeciesia! Mienavita ŭ Kijevie dniami abvieščanaja Supolnaść demakratyčnaha vybaru. Dastatkova zirnuć na mapu, kab pierakanacca, što novaje ŭtvareńnie biare biełaruski arešak u abcuhi.
I pieramoha Kačyńskaha ŭ Polščy, i pośpiech Merkiel u Niamieččynie — taksama abjektyŭnyja čyńniki bolej žorstkaj linii Eŭropy ŭ dačynieńni da aficyjnaha Miensku. Mo pana Kačyńskaha dy fraŭ Merkiel pryviali da ŭłady ahienty biełaruskaj apazycyi?
Varta nahadać, što ministry zamiežnych spraŭ Eŭraźviazu jašče na pačatku listapada papiaredzili Miensk: kali pieradvybarčyja realii ŭ krainie nia stanuć bolej cyvilizavanymi, to kiroŭnym viarcham varta čakać niepryjemnaściaŭ. Najpierš pašyrycca čorny śpis «nieŭjaznoha» čynavienstva dy buduć zamarožanyja čyje-kolviek rachunki ŭ tamtejšych bankach.
Rada Eŭraźviazu paabiacała viarnucca da pytańnia nieŭzabavie paśla kaladnych vakacyjaŭ. Ale represiŭnyja naveli biełaruskaha zakanadaŭstva prymusili Brusel zrabić admysłovuju zajavu. Miensk papiaredzili pra «surjoznyja nastupstvy». I asabliva padkreślili hatovaść krainaŭ Eŭraźviazu supracoŭničać u biełaruskim pytańni z ZŠA. Tendencyja da zbližeńnia adpaviednych pazycyjaŭ Bruselu i Vašynhtonu — vidavočnaja.
Nu a Kandaliza Rajs, sami viedajecie, daŭno pra ŭsio skazała adkrytym tekstam. Reakcyja Dziarždepu na «papraŭki KDB» tolki paćviardžaje: Štaty pilna manitorać sytuacyju.
Inšaja reč, što, jak by ni demanizavała Zachad tutejšaja prapahanda, nasamreč nichto tam nie źbirajecca nasadžać u nas demakratyju ahniom dy miečam. I pakul značnaja častka suajčyńnikaŭ pakorliva zhadžajecca z reinkarnacyjaj «saŭka», ułady, naturalna, buduć metadyčna hnuć svajo. A na zajavy Zachadu — načchać! Chaj pasprabujuć ukusić, tym bolej što asobnyja eŭrapiejskija demakratyi dobra padsieli na našyja naftapradukty dy kalijny tranzyt!
U supraćstajańni z Zachadam aficyjny Miensk mocna spadziajecca na rasiejski tył. Zrešty, i tut nia ŭsio tak prosta. Za niedaroblenym fasadam sajuznaje dziaržavy kožny ciahnie koŭdru ŭ svoj bok. Šerah analitykaŭ upeŭnienyja: varta Maskvie ŭbačyć mocnuju, realnuju alternatyvu dziejnamu biełaruskamu kiraŭniku — i raspačniecca zusim inšaja hulnia.
Karaciej, vysnovy dźvie.
Z adnaho boku, naiŭna mierkavać, što zaraz u Zachadu łopnie ciarpieńnie — i jon niejkimi nadzvyčajnymi mierami demakratyzuje Biełaruś. Dy tak, što nikomu tut navat dulu z kišeni dastavać nie daviadziecca...
Tym bolej naiŭna čakać demakratyčnaha impetu ad Kramla.
Ź inšaha boku, navat «elehantnaja pieramoha» na vybarach-2006 nie abiacaje tutejšym viarcham spakojnaha snu.
Pačniecca novy akt biełaruskaj dramy, u jakoj moža być niestandartnaja raźviazka.
