Dyrektar Kijeŭskaha ekolaha‑kulturnaha centru Uładzimier Barejka nia vieryć zapeŭnivańniam ukrainskaha Ministerstva pa nadzvyčajnych sytuacyjach, što fosfarnaj chmary nie isnuje.
Pra heta jon zajaviŭ u interviju karespandentu ukrainskaha infarmahienctva UNIAN: «Nakolki mnie viadoma, chmara pajšła na paŭnočny zachad. Dziaržorhany ćvierdziać, što dalej Lvoŭščyny jana nia projdzie, ale heta nia tak. Chmara moža pajści na paleskija vobłaści Ŭkrainy, tak i na Polšču ci Biełaruś. I atrutnyja rečyvy, chutčej za ŭsio, ŭžo trapili za terytoryju vobłaści».
Nahadajem, što 16 lipienia a 16.55 pa mienskim časie ŭ Buśkim rajonie Lvoŭskaj vobłaści (60 km na paŭnočny ŭschod ad Lvova) zdaryłasia katastrofa. Syšli z rejkaŭ i pierakulilisia 15 cysternaŭ tavarnaha ciahnika № 2005, što pieravoziŭ z Kazachstana ŭ Polšču žoŭty fosfar. 6 cysternaŭ zaharelisia.
Žoŭty fosfar — madyfikacyja zvyčajnaha fosfaru, što vykarystoŭvajecca ŭ vytvorčaści zapałak i vielmi niebiaśpiečny dla zdaroŭja. Jon zaharajecca pry temperatury 34 hradusy, a ŭ minimalnych dozach śmiarotna niebśpiečny dla zdaroŭja.
Adrazu pačalisia pracy pa likvidacyi nastupstvaŭ avaryi i navat prybyli inžynery z Kazachstanu. Z prylehłych rajonaŭ evakuavali 800 čałaviek, 145 čałaviek špitalizavanyja, ź 43 dziciaci z dyjahnazam «atručvańnie parami fosfaru». Ciahniki Miensk — Varna i Miensk — Ivan‑Frankoŭsk źmianili maršrut śledavańnia, kab abyści rajon katastrofy.
Padčas tušeńnia pažaru ŭtvaryłasia chmara z praduktami hareńnia. 18 lipienia MNS Ukrainy vystupiŭ z zajavaj, što pahrozy vypadzieńnia apadkaŭ nie isnuje, i ŭzrovień atrutnych rečyvaŭ nie pieravyšaje normy.
Ale nie vyklučajecca mahčymaść paŭtornaj uciečki fosfaru ź pieraviernutych cysternaŭ pry sprobie ich uźniać dla transpartavańnia.
MNS Biełarusi taksama zajaviŭ, što pahrozy nie isnuje, a ŭ pamiežnych z Ukrainaj rajonach viadziecca manitorynh pavietra i pakul pieravyšeńnia dapuščalnych normaŭ nia vyjaŭlena.
Tym časam na Bieraściejščynie, jak pieradaje naš karespandent, nasielnictva znachodzicca ŭ panicy. Čutki padahravajucca rasiejskimi elektronnymi ŚMI, jaki praciahvajuć nahniatać abstanoŭku, zajaŭlajučy, što va Ŭkrainie zdaryŭsia sapraŭdny druhi Čarnobyl. Miascovyja «dobrazyčliŭcy» rajać ludziam advozić dziaciej u paŭnočnyja rajony, u pryvatnaści ŭ Miensk.
Praŭda, jašče ŭčora pamianiaŭsia kirunak vietru na paŭnočna‑zachodni i ciapier jon naadvarot dźmie ź biełaruskaha Paleśsia na Ŭkrainu.
Na polskich sajtach, navina pra katastrofu, sastupiła inšym, bolš aktualnym, prykładam, vybuchu na Manchetanie, katastrofie ŭ Brazylii i avaryi ŭ Vuhorščynie aŭtobusa z rumynskimi pasažyrami. Na ŭkrainskich sajtach navina pra žoŭty fosfar taksama sastupaje miesca bolš aktualnym.
