Adstaŭka Sucharenki sparadziła veer versijaŭ. Jak minimum adnu ź ich abvierhnuŭ siońnia Alaksandar Łukašenka, prezentujučy novaha šefa specsłužby.
Prezydent pachvaliŭ kahebistaŭ za polskich špijonaŭ. Miž tym chto-kolviek mierkavaŭ: Sucharenka pahareŭ mienavita na hetym skandale. Maŭlaŭ, choćki-niachoćki zhulaŭ u maskoŭskuju hulniu. Sapraŭdy, svarycca z Varšavaj Miensku absalutna niavyhadna. Naadvarot, za apošnija miesiacy stolki było patračana pijaraŭskaha porachu, kab davieści Eŭraźviazu nastroj na prahmatyčnuju supracu! Svarka ž biełaruskaha kiraŭnictva z Polščaj i Zachadam uvohule vyhadnaja rasiejskim viarcham.
Budziem sačyć, što jašče skaža siońnia Łukašenka. Mahčyma, niejkija cikavyja niuansy padaść uviečary televizija. Chacia, kaniešnie, pra patajemnyja spružyny siužetu, u vyniku jakoha specsłužbu niečakana ŭznačaliŭ hienerał-tankist, mo' nie daviedajemsia całkam i nikoli.
Zrešty, niekatoryja versii niezaležnych medyjaŭ apryjory vyklikajuć uśmiešku. Maŭlaŭ, ci nia jość hetaja kadravaja pieratasoŭka mesydžam Zachadu, sprobaj palepšyć imidž KHB? Dla Zachadu što Sucharenka, što Žadobin…
Reč u systemie. A jana paśla peryjadu niaŭdałych zalacańniaŭ da Zachadu znoŭ natapyrvajecca. Znoŭ zapatrabavanaja atmasfera atočanaj fartecyi. Tak što viedamstva sa specyfičnaj reputacyjaj budzie tolki macnieć dy ŭzmacniacca jak maha bolej addanymi ludźmi. "Upeŭnieny, što Juryj Žadobin naviadzie paradak, jakoha siońnia nie chapaje ŭ KDB", — skazaŭ Łukašenka.
ZY. Pa haračych śladach temu kadravaha pieratrusu ŭ KHB daviałosia abmiarkoŭvać i ŭ etery "Svabody". I voś tolki što siužet niečakana pradoŭžyŭ kiraŭnik dziaržavy, zajaviŭšy, što treba adsiakać ruki tym u KHB, chto "kryšujet" (nia viedaju, jak i pierakłaści:-) biznes.
