Apazycyjnaha palityka Paŭła Sieviarynca i sustaršyniu arhkamiteta pa stvareńni partyi «Biełaruskaja chryścijanskaja demakratyja» Alaksieja Šeina z Frunzienskaha UUS stalicy pieravieźli ŭ śpiecpryjomnik-raźmierkavalnik HUUS Minharvykankama. Pra heta BiełaPAN paviedamiŭ aktyvist niezarehistravanaha «Maładoha frontu» Barys Harecki.
Jon i jašče niekalki tavaryšaŭ zatrymanych palitykaŭ znachodzilisia kala budynka rajonnaha ŭpraŭleńnia ŭnutranych spraŭ padčas razboru z P.Sieviaryncam i A.Šeinym. Pavodle słoŭ B.Hareckaha, u budynku znachodziłasia advakat P.Sieviarynca, adnak pa patrabavańni supracoŭnikaŭ milicyi jana musiła pakinuć pamiaškańnie.
Nahadajem, P.Sieviaryniec i A.Šein byli zatrymanyja prykładna ŭ 20.30 na stancyi mietro «Puškinskaja» z pryčyny taho, što maładyja ludzi nibyta mohuć mieć dačynieńnie da niejkaha kvaternaha kradziažu. Pra heta paviedamiŭ BiełaPAN A.Šein, kali jaho mabilny telefon jašče nia byŭ vyklučany. Ciapier pa sotavaj suviazi niedastupny ni jon, ni P.Sieviaryniec. Padčas ahladu asabistych rečaŭ u aktyvistaŭ byli znojdzieny 150 asobnikaŭ ahitacyjnych materyjałaŭ ź infarmacyjaj ab praviadzieńni apazicyjnymi siłami 27 lipienia akcyj z nahody hadaviny pryniaćcia Dekłaracyi ab dziaržaŭnym suvierenitecie Respubliki Biełaruś.
B.Harecki taksama paviedamiŭ, što prykładna ŭ 21.30 na płoščy Jakuba Kołasa ŭ centry Minska byli zatrymanyja čatyry aktyvisty niezarehistravanaj arhanizacyi «Małady front». Ich dastavili ŭ Savieckaje UUS. Źviazacca ź imi niama mahčymaści.
Paźniej nadyšła infarmacyja, što i na mienskaj kvatery presavaha sakratara niezarehistravanaj arhanizacyi «Małady front» Barysa Hareckaha pačaŭsia pieratrus. Supracoŭniki milicyi i KHB skazali aktyvistu, što heta źviazana z kryminalnaj spravaj raspačataj suprać inšaj maładafrontaŭki Nasty Azarki za ŭdzieł u niezarehistravanaj arhanizacyi.
