Ja pačuŭ pra heta ad znajomaj, jakaja naviedvaje adnu ź mienskich pratestanckich cerkvaŭ. «Svaboda pryjdzie ŭ Biełaruś za adnu noč, biez adzinaha strełu». Nibyta było takoje praroctva adnaho z «šanavanych preśviteraŭ». Ja staŭ šukać kancy, i voś što vyśvietliŭ.
Uvosień 2003 h. Miensk naviedaŭ zasnavalnik piacidziasiatnickaj carkvy Times Square Church u Ńju-Jorku Devid Uiłkiersan. Vystupajučy pierad kiraŭnikami miascovych evanhielisckich hramadaŭ, jon abvieściŭ praroctva pra Biełaruś. Vystup mieŭ vialiki rozhałas. Ciapier chto-nichto śćviardžaje, što praroctva pačynaje spraŭdžvacca.
«Ja bačyŭ u Duchu nacyju ŭ łancuhach, i djabał sprabuje źviazać Carkvu Isusa Chrysta, — takoje bačańnie mieŭ pastar, pierad tym jak pryjechać u Biełaruś. — Ciapier u Biełarusi zaćviardžajucca zakony i praviły, jakija abmiažoŭvajuć ruch Božy. Ale vy pavinny być patryjotami...» — kaža jon. Aŭdyjozapis jahonaha vystupu zachavaŭsia.
Treba patłumačyć, što piacidziasiatnikaŭ vyłučaje viera ŭ mahčymaść niepasrednaha kantaktu z Boham praź Śviatoha Ducha, a taksama ŭ mahčymaść jahonych daroŭ — praroctva, «havareńnia na nieviadomych movach», h.zv. hłasałalii. Heta sapraŭdy maje miesca padčas evanhielisckich bahasłužbaŭ, na jakich vierniki pałymiana molacca.
74-hadovy Devid Uiłkiersan — prapaviednik i piśmieńnik. Razam z bratam jany zasnavali Suśvietnaje chryścijanskaje słužeńnie Teen Challenge — reabilitacyjnyja centry dla narkamanaŭ i alkaholikaŭ. Admietnaściu carkvy Uiłkiersana Times Square Church jość toje, što asnoŭnyja jaje aktyvy naležać reabilitavanym złačyncam.
Uiłkiersan nia ličycca ŭ carkvie prarokam, ale heta vielmi šanavany prapaviednik.
Hospad skazaŭ Uiłkiersanu: «Ja zrynuŭ žaleznuju zasłonu, i Ja zrynu hetuju zasłonu ŭ Biełarusi. I strach, jaki źviazvaŭ vas mnohija hady, rušycca ŭžo ciapier!..»
«Kali ja źjedu, — pradkazvaŭ Uiłkiersan, — na praciahu niejkaha času ŭ vas, mažliva, budzie jašče bolš składana, i vy padumajecie, što heta było iłžepraroctva», — zaŭvažyŭ pastar. Na dumku viernikaŭ, u hetaj častcy praroctva spraŭdziłasia: u nastupnyja hady dziaržava vyjaŭlała da ichnych supołak, tak by mović, pavyšanuju cikavaść, až da sprobaŭ zabarony niekatorych ź ich.
Pastar mienskaj carkvy «Novaje žyćcio» Viačasłaŭ Hančarenka kaža: «Praroctva spraŭdzić čas». Inšyja pratestanckija pastary abmiažoŭvajucca kanstatacyjaj faktu: «Tak treba Bohu. Što maje adbycca — adbudziecca. Boh nie pakinie biez adkazu ŭcisk svaich viernikaŭ».
«Praroctva ździejśnicca, kali vy pavierycie ŭ jaho…» — tak skončyŭ svaju kazań a.Uiłkiersan.
Jahonyja słovy vierniki pieradajuć z vusnaŭ u vusny. Možna vieryć praroctvam, možna — nie, ale sam fakt, što takoje pieradajuć z vusnaŭ u vusny, śviedčyć: usio bolš ludziej u krainie prahnuć pieramienaŭ.
