Upieršyniu za 18‑hadovuju historyju fest va ŭročyščy Baro prachodziŭ u try dni. Mažlivaść vystupić atrymali jak miascovyja panki‑pačatkoŭcy, tak i zamiežnyja hości. «A ŭ vas tut dušeŭna prymajuć», — kaža pierad vychadam na scenu lider litoŭskaha hurtu «Mountainside». Hość nie rasčaravaŭsia paśla vystupu, choć na placoŭcy pierad scenaj taŭklisia tolki niekalki čałaviek. Žyćcio na «Basoviščy» pačynaje viravać pad viečar, kali vystupajuć chedłajnery. Adnolkava dobra prymajuć fołk‑madern ad «Pałacu», «kazacki rok» ad «Tiń Soncia», rep ad «Čpb». Debiutavaŭ na «Basoviščy» prajekt «Krambambula». Darečy, arhanizatary mierkavali zaprasić i «Lapis Trubiackoj», ale ŭ tych byŭ kancert u Kijevie. Festyval pieražyŭ «kryzis žanru»: kali niekalki hod tamu jaho možna było śmieła nazvać «festam ciažkaha roku», to sioleta muzyka była napraŭdu na luby hust.
Pieramahła muzyka
Razynka kožnaha «Basovišča» — konkurs maładych kamandaŭ. Vakoł jaho z kožnym hodam usio bolej sprečak. Skiepsis najpierš vyklikaje ŭzrovień udzielnikaŭ u apošnija dva hady. Hurtoŭ, blizkich da raniejšych laŭreataŭ, — «maŭzeraŭ», IQ48, Indiga — i blizka niama. Sioletni konkurs možna nazvać adnym z samych słabych u historyi «Basovišča». Zajaŭki na ŭdzieł padała niemałaja kolkaść hurtoŭ — 53, adnak vartych pieramohi było zusim niašmat. Na ahulnym fonie adrazu vyłučyłasia navapołackaja kamanda «Flaŭs i Klajn», jakaja paśpieła skaryć dvojčy «Rok‑Koła» i «Rok‑karanacyju» u naminacyi «Lepšaja rehijanalnaja kamanda». Adzinaja biada — hurt zaŭždy śpiavaŭ pa‑rasiejsku, ale pad «Basovišča» pierakłaŭ niekalki tekstaŭ. Vakalist hurtu Siarhiej (na fota sprava) šalona skakaŭ pa scenie, vysałapiŭšy jazyk dy nadryŭna śpiavaŭ: «Na haryzoncie ŭ prazrystym zoncie toje nieba». Słovaŭ było praktyčna nie razabrać, zatoje enerhietyka išła ad «Flaŭsaŭ» — oho‑ho! Žury pry vyznačeńni pieramožcy padzialiłasia: adny adstojvali pryncyp «biełaruskaści», pad jaki «Flaŭsy» nie zusim padpadali, druhija na pieršaje miesca stavili muzyčny čyńnik. Navapołacki hurt usio ž pieramoh. Publika ŭspryniała hetuju navinu nieadnaznačna. Kali Siarhiej z «Flaŭsa» pry ŭručeńni pryzu vybačaŭsia, što nia viedaje biełaruskaj i budzie kazać pa‑rasiejsku, jaho ledź nie aśvistali. Na druhoje miesca žury pastaviła ekstrymałaŭ z hurtu «SOK», a na 3‑ie — prajekt «Unia» z pseŭdafolkavym adcieńniem.
«Basovišču» treba zorka
Na hetym «Basoviščy», jak nikoli, abvastryłasia prablema «biełaruskaści» muzyki. Maładyja kamandy zbolšaha piajuć pa‑rasiejsku albo pa‑anhielsku, a na rodnuju movu pierachodziać tolki dla ŭdziełu ŭ peŭnaj składancy albo festyvali. Ź inšaha boku: chto ciapier uzhadaje, što «Indyha» i «IQ48» koliś śpiavali pa‑rasiejsku? Tut nie na movie treba zahaniacca. Vybiracca ź lakalnaje pastki, zbudavać bolšuju scenu, pašyryć infrastrukturu dy zaprasić zorku suśvietnaha ŭzroŭniu, — takija zadačy musiać stajać pierad arhanizatarami ŭ budučyni.
