Urad Biełarusi ŭchvaliŭ šerah mierapryjemstvaŭ mižnarodnaj techničnaj dapamohi Eŭraźviazu. Siarod zaćvierdžanych — prajekty Rehijanalnaj prahramy dziejańniaŭ TASIS na 2006 hod — takoje paviedamleńnie prajšło ŭ ŚMI. Čytač, peŭna, moh by zabłytacca — jak tak, kali na kalendary ŭžo paŭhodu 2007‑y, a ŭchvalenyja prajekty za minuły hod. Nasamreč, heta aznačaje, što rehijanalnaja prahrama była ŭchvalenaja ŭ 2006 hodzie i praduhledžvaje realizacyju šerahu prajektaŭ, jakija pačynajucca ŭ 2007 hodzie. Akramia ŭsiaho, usie prajekty rehistruje ŭrad, i pracedura rehistarcyi zajmaje bahata času.
Što ŭchvalena
Prajekt «Spryjańnie realizacyi Kijockaha pratakołu». Prajekt važny jak dla Biełarusi, tak i dla krain‑susiedziaŭ. Jahonaja meta — raźvićcio techničnaha, instytucyjnaha i čałaviečaha patencyjału ŭ Biełarusi i va Ŭkrainie dla praviadzieńnia manitorynhu vykidaŭ parnikovych hazaŭ pavodle mižnarodnych standartaŭ. I, pry nieabchodnaści, vykarystańnia adpracavanych u Eŭropie mechanizmaŭ dla źmianšeńnia hetych vykidaŭ.
Druhi ŭchvaleny prajekt raspracoŭvaŭsia ŭ ramkach Eŭrapiejskaj inicyjatyvy pa demakratyi i pravach čałavieka i nazyvajecca «Infarmacyjna‑ metadyčny centar prablem siamji». Viadziecca pra stvareńnie centru, jaki padtrymlivaje realizacyju pravoŭ dziaciej na adukacyju, u pryvatnaści, dapamohu dla ŭklučeńnia ŭ adukacyjny praces dziaciej z asablivaściami raźvićcia.
Treci prajekt — «Adnaŭleńnie terytoryj, što paciarpieli ŭ vyniku avaryi na ČAES, z vykarystańniem novych ekalahičnych technalohijaŭ» — budzie realizoŭvacca ŭ ramkach mižnarodnaj prahramy reabilitacyi zabrudžanych teryjatoryj CORE. Faktyčna, jon praduhledžvaje ŭviadzieńnie novych technalohijaŭ na ŭzroŭni pryvatnych padsobnych haspadarak, jakija dazvolać sielskim žycharam atrymlivać čystuju pradukcyju z najbolšym ekanamičnym efektam. Prajekt hety pavinien byŭ pačacca značna raniej, ale svaju rolu adyhrali ciažkaści ź jaho dziaržaŭnaj rehistracyjaj. Dziaržava, nahadajem, rehistruje kožny prajekt. Časam pracedura nastolki zaciahvajecca, što Eŭrakamisija vymušanaja častku prajektaŭ spynić albo spynić finansavańnie, bo krajnija terminy dla pačatku realizacyi ŭžo vyčarpanyja. Bolš za pałovu prajektaŭ, jakija Eŭrakamisija planavała realizavać u ramkach CORE (na sumu zvyš miljona eŭra) admienienyja z‑za nievykanańnia terminaŭ. Na dadzienym etapie Eŭrakamisija rychtujecca da realizacyi novaha prajektu sumiesna z Prahramaj Raźvićcia AAN (UNDP), jakaja taksama ažyćciaŭlaje postčarnobylskuju dapamohu.
Jašče dva prajekty (častka prahramy transpamiežnaha supracoŭnictva i dobrasusiedztva, nakiravanaja na pavieličeńnie dynamizmu ŭ kaaperacyi pamiž pamiežnymi rehijonami EZ i Biełarusi) — «Stvareńnie biełaruska‑łatvijskaha supracoŭnictva ŭ sektary dziciačaj paliatyŭnaj dapamohi» i «Mastactva biaź miežaŭ — papularyzacyja pamiežnaj kulturnaj industryi praz mastactva Marka Šahała i Marka Rotki».
***
Dadzienaja publikacyja padrychtavanaja pry spryjańni Eŭraźviazu i nie abaviazkova adlustroŭvaje aficyjny punkt hledžańnia EZ. Pa dadatkovuju infarmacyju źviartajciesia na sajt www.delblr.ec.europa.eu