Hety postynh naviejany dyskusijaj vakoł mierkavańnia Eniry Branickaj. Jaje asabliva "ciopłaje" staŭleńnie da byłoha šefa KHB całkam zrazumiełaje. Adnak havorka pra inšaje — pryncypy dziejnaści medyjaŭ.
U vajnu savieckija hazety malavali niemcaŭ z rahami. Potym film sa Šcirlicam mieŭ sensacyjny pośpiech jašče i tamu, što narod ubačyŭ psychalahičnyja partrety słuhaŭ hitleraŭskaha režymu. I razumniejšyja hledačy ŭrazilisia, nakolki padobnyja lozunhi, noravy aparatu, matyvy dziejańniaŭ u trecim rajchu i pry kamunistyčnym ładzie. Nia čerci rahatyja, a žyvyja ludzi prydumlajuć biesčałaviečnuju systemu (u tym liku, rana ci pozna, i na svaju hałavu)!
Publikacyi karespandentaŭ "Narodnaj voli" paśla naviedvańnia vioski Zdudzičy (akramia interviju z byłym šefam specsłužby, ja maju na ŭvazie jašče i zamaloŭku pra baćkoŭ Ryhora Kisiala), a taksama nastupny kamentar u "NN" vyśviečvajuć važnuju akaličnaść. A mienavita: i Sucharenka, i Kisiel (ź jakim ja vučyŭsia na žurfaku BDU i byŭ u narmalovych stasunkach), jak i sam Łukašenka — heta nie demaničny desant inšaplanetnikaŭ. Tutejšyja, z prostych siemjaŭ. Zhadajcie: elektarat družna hałasavaŭ za Łukašenku (a šmat chto hatovy za jaho pierahryźci horła i ciapier!) na hlebie elementarnaj vysnovy: jon ža zusim taki, jak my!
Udumlivaj publicy heta daje šturšok da rozdumu ab paradoksach i zakanamiernaściach našaj najnoŭšaj historyi, stanie hramadztva, šlachach pieraadoleńnia anamalijaŭ. Kali admovicca ad demanizacyi, adrazu ŭźnikaje proćma składanych pytańniaŭ! Nu a ŭ kahości — tolki adno pytańnie: čamu heta pradstaŭnikoŭ "złačynnaha režymu" namalavali biaz roh?
Uvohule spračacca na hetu temu navat sumna. Usio daŭno skazana. Utylitaryscki, vulharna-palityzavany padychod da medyjaŭ sto hadoŭ tamu vykłaŭ dziadula Lenin. Niekatoryja siońniašnija dyskutanty navat nie padazrajuć, što prosta kapijujuć jaho:) Praca "Partyjnaja arhanizacyja i partyjnaja litaratura" (pad litaraturaj tut majecca na ŭvazie mienavita žurnalistyka): "Dałoŭ litarataraŭ biespartyjnych! Dałoŭ litarataraŭ zvyščałaviekaŭ! Litaraturnaja sprava musić stać častkaj ahulnapraletarskaj spravy, "kołcam dy šrubkaj" adnaho-adzinaha, vialikaha sacyjał-demakratyčnaha mechanizmu, što pryvodzicca ŭ ruch usim śviadomym avanhardam usiaje pracoŭnaj klasy".
Nu čym nie manifest siońniašniaha "śviadomaha avanhardu"? :)
A ciapier niekali tezaŭ, vykładanych tearetykami medyjnaj sfery (achvotnyja mohuć znajści haru adpaviednaj litaratury).
Kaniešnie, rafinavanaja abjektyŭnaść jość mitam. Vydańnie nia musić być śmietnikam. Peŭny kirunak — heta narmalova. Pluralizm składajecca z hamy medyjaŭ, a nie ź vinehretu ŭ asobnaj hazecie. I razam z tym — heta vyrazna pakazvaje dośvied raźvitych demakratyjaŭ — papularnymi, aŭtarytetnymi stanoviacca tyja vydańni, jakija, chaj sabie majučy peŭnaje palityčnaje adcieńnie, imknucca da šyrokaha aśviatleńnia i ŭzvažanaha kamentavańnia padziejaŭ, a nia staviać vyšej za ŭsio nakidańnie peŭnaj idejalohii. Inačaj čakaje marhines (prykładam jość los lavackich vydańniaŭ na Zachadzie). Tak, u Francyi šyroka razychodziacca pamiarkoŭna-kanservatyŭnaja "Mond", umierana-liberalnaja "Liberaśjon", strymana-katalickaja "Krua". I razam z tym cicha pamiraje sa svaim niepazbyŭnym čyrvonym klajmom "Jumanite".
Zajdziecie na sajty niekatorych partyjaŭ ci asobnych palityčnych pasijanaraŭ — i adčujcie roźnicu pamiž prapahandaj (ci, skažam bolej karektna, partyjnym pijaram) dy prafesijnaj žurnalistykaj.
Dyskusii ab pryncypach alternatyŭnaha medyjnaha ŭździejańnia na biełarusaŭ viaducca daŭno. Zmahajucca — ja, kaniešnie, spraščaju — "revalucyjny" i "adukacyjny" ("kulturnicki") padychody. I časta hołas prafesijanałaŭ zahłušajecca pałymianymi tezami zmaharoŭ. Kali pačynajuć kamandavać presaj, ničoha dobraha nie atrymlivajecca. Prymityŭnaja palityčnaja anhažavanaść jość pastkaj. Praca medyjaŭ musić budavacca nie pavodle apazycyjnych stratehijaŭ, a pavodle medyjnych zakonaŭ. Dajcie viery prafesijanałam!
Kaniešnie, u razhar palityčnaj kryzy medyi-ulotki zdolnyja adyhrać važnuju mabilizacyjnuju rolu. Ale ŭ zvyčajnym žyćci "bajavyja listki" čytać niecikava.
P.S. Dla mianie adzin z kryteraŭ "medyjnaj narmalovaści" — humar. Kali jaho na sajcie (u vydańni) niama, kali zdarovaja ironija (cudoŭny srodak ad pierahinaŭ!) ŭsprymajecca jak ździek nad śviatym — heta ciažki vypadak. Jak kazaŭ adzin kinahieroj, usie najvialikšyja hłupstvy na śviecie robiacca z samym surjoznym vyrazam tvaru.
