U sudzie nad byłym namieśnikam ministra ŭnutranych spraŭ Jaŭhienam Południem praciahvajecca dopyt śviedak. «Kali skončycca sudovaje śledstva, pakul skazać składana», — paviedamili ŭ Viarchoŭnym Sudzie.
«Praces zakryty. Ale, mahčyma, my ahučym vynikovuju častku albo praviadziem nievialiki bryfinh. Jašče nie dumali pra heta», — skazała pres-sakratar Maryna Łapo.
Chto vyklikany ŭ jakaści śviedak, u pres-słužbie nie paviedamili.
Jaŭhiena Południa, jaki za hod da aryštu vyznačyŭsia aktyŭnym udziełam u razhonie Płoščy, sudziać pavodle abvinavačańnia ŭ słužbovych złoŭžyvańniach. Jaho spravu 14 studzienia pačała razhladać vajskovaja kalehija Viarchoŭnaha suda. Vajskovaja kalehija Viarchoŭnaha suda jašče ŭ kancy minułaha hoda začyniła praces dla žurnalistaŭ i publiki.
Jak paviedamiła prakuratura Biełarusi, byłoha milicyjanta abvinavačvajuć pavodle dvuch artykułaŭ: złoŭžyvańnie ŭładaj i pieravyšeńnie ŭłady. Śledstva miarkuje, što Połudzień sistematyčna i praciahły čas atrymlivaŭ ad słužbovych asobaŭ orhanaŭ unutranych spraŭ materyjalnyja kaštoŭnaści i hrašovyja srodki. Adnak pamier hetych «padnašeńniaŭ» zastajecca nieviadomym.