Siońnia, 2 žniŭnia, sudździa Viarchoŭnaha sudu Biełarusi Hanna Sakałoŭskaja na šeść miesiacaŭ prypyniła dziejnaść Partyi kamunistaŭ Biełarusi (PKB). Mienavita na takim pakarańni nastojvała ŭ pazovie Ministerstva justycyi.
Prablemy ŭ eŭrakamunistaŭ pačalisia z momantu «abjadnaŭčaha źjezdu» dźviuch kamunistyčnych partyjaŭ, jaki prajšoŭ minułym letam. 25 žniŭnia 2006 h. kamunisty atrymali pieršaje papiaredžańnie ad Minjustu paśla taho, jak nie padali śpisy siabroŭ svajoj partyi. Paźniej takija śpisy byli padadzienyja, ale ŭ ministerstva ŭźnikli pytańni adnosna paradku ŭliku siabroŭ partyi. Pa hetym punkcie PKB atrymała druhoje piśmovaje papiaredžańnie ad Minjustu, jakoje datavałasia 4 studzienia. Mienavita z hetaj pryčyny praces likvidacyi nia byŭ spynieny, jak nastojvali siabry partyi.
Treciaje papiaredžańnie PKB było vyniesienaje paśla źjezdu «Sajuzu levych sił», jakija prajšoŭ u śniežni 2006 h. u Čarnihavie. Dla taho kab likvidavać ci prypynić dziejnaść palityčnaj partyi dastatkova ŭsiaho adnaho papiaredžańnia.
U aŭtorak i sieradu ŭ Viarchoŭnym sudzie adbyvalisia słuchańni bakoŭ. Pradstaŭnik Minjustu sp. Charyton nastojvaŭ na tym, što dziejnaść PKB musić być prypynienaja ŭ suviazi sa šmatlikimi parušeńniami zakonu ab palityčnych partyjach. Lider PKB Siarhiej Kalakin, jaki pradstaŭlaŭ u sudzie intaresy svajoj partyi, ličyŭ, što ŭsie parušeńni daŭno byli vypraŭlenymi i sprava musić być zakrytaja.
U čaćvier a 17:00 sudździa Hanna Sakałoŭskaja pačała ahučvać rašeńnie sudu pa hetaj spravie. Jana całkam zadavoliła pozvu Minjustu. Dziejnaść PKB była prypyniena na paŭhodu z pryčyny taho, što partyja nie padavała ŭ čas źviestki pra kolkasny skład, a u niekatorych haradach u piarvičnych arhanizacyjaŭ partyi adsutničaŭ jurydyčny adras. Razam z tym, sudom razhladalisia i tyja papiaredžańni PKB, jakija byli vyniesienyja ŭžo niekalki hadoŭ tamu i termin dziejańnia jakich užo skončyłasia. Tak, razhladałasia papiaredžańnie vyniesienaje kamunistam 10 červienia 2004 hodu za toje, što partyja zaklikała svaich prychilnikaŭ praź ŚMI pryjści na niedazvolenuju ŭładami akcyju «Łancuh nieabyjakavych čytačoŭ» u padtrymku hazety «Narodnaja vola».
Termin prypynieńnia dziejnaści partyi kančajecca 2 lutaha 2008 h. Za hety čas partyi nie dazvalajecca pravodzić usialakuju dziejnaść, aproč źviazanaj z vypraŭleńniem pravaparušeńniaŭ. Taksama PKB nie dazvalajecca karystacca partyjnymi bankaŭskimi rachunkami. Rašeńnie Viarchoŭnaha sudu kančatkovaje i nia moža być abskardžanaje.
Pa vychadzie z sudu lider PKB Siarhiej Kalakin adznačyŭ, što dla jaho hetaje rašeńnie stałasia čakanym. «Hety krok uładaŭ nijak nie adabjecca na palityčnaj aktyŭnaści prychilnikaŭ kamunistyčnaha ruchu Biełarusi. Navat, kali zaŭtra buduć abjaŭlenyja parlamenckija vybary, to siabry našaj partyi pojduć na ich praz zbor podpisaŭ. Pavodle našych źviestak, ułady na 90-yja ŭhodki Vialikaj kastryčnickaj revalucyi rychtujuć kamunistyčny źjezd. U im musiać uziać udzieł kampartyi Biełarusi, Rasiei, Ukrainy, Hrecyi. Kali ŭ krainie było dźvie kamunistyčnyja partyi, to ŭłady musili b zaprasić i nas, a tak niama prablemaŭ. Razam z tym chaču adznačyć, što hetymi dniami salidarnaść z nami vykazali kampartyi Čechii, Francyi, Italii i inšych krain, jakija padtrymlivajuć šlach Biełarusi da demakratyzacyi», - skazaŭ Siarhiej Kalakin.
