Korpaŭsia kolki dzion tamu ŭ šafie j niespadziavana vyciahnuŭ kartku z čyrvonaju «Pahoniaju». Čeki «Majomaść», prazvanyja ŭ narodzie na rasiejski kapył «vaŭčary». Kali ciapieraka zapytacca ŭ narodu pra tuju pryvatyzacyju, dyk pačuješ narakańni, što padmanuli narod…
Pieršy raz dziaržava niešta addała prostamu čałavieku za tak. Ale prosty čałaviek, nie navučany karystacca kapitalistyčnymi pryładami, pradaŭ tyja čeki ci ŭ najlepšym vypadku ŭkłaŭ u investycyjny fond. Nia budziem čapać sumny los fondaŭ. Pryhledziemsia da spadziavańniaŭ prostaha čałavieka. Amal kožny adpačatku čakaŭ šalonych hrošaj‑dyvidendaŭ.
Niejak pačuŭ telefanavańnie na radyjo Svaboda. Stary skardziŭsia, što ŭkłaŭ svaje čeki ŭ akcyi niejkaha pradpryjemstva. Toje praź piać hod naličyła dyvidendy — nia chopić i na aŭtobusny talon. Voś jakija machlary, licha ich matary…
Jak vyśvietliłasia, za miažoju viedajuć adzin sakret! Nichto nie kuplaje akcyj dziela dyvidendaŭ! Akcyi kuplajucca dziela akcyj. Jakija možna zaŭždy pradać. Čałaviek planuje, što košt ich praz peŭnuju kolkaść hod uzdymiecca i možna budzie vyhadna ich pradać, naprykład, dziela apłaty adukacyi dziaciej.
Košt akcyj składajecca z koštu pradpryjemstva. A pradpryjemstva vartaje nahetulki, nakolki vartaje jaje abstalavańnie, mašyny i pryłady. Ahulny košt pradpryjemstva dzielicca na kolkaść akcyj, i my daviedajemsia realnuju canu adnoj akcyi. Kali znošanaść našych zavodaŭ bolšaja za 70%, pra što havaryć…
Štohod na schody źbirajucca akcyjanery pradpryjemstva i vyrašajuć, što rabić z prybytkam (kali jon naahuł jość). Možna całkam addać na vypłatu dyvidendaŭ. Pra heta maryć bolšaść šarahovych ułaśnikaŭ akcyj u našaj krainie. Ale mahčyma taksama j vydatkavać tyja srodki na vytvorčyja patreby — nabyćcio novaha abstalavańnia. Tady hrošaj hatoŭkaju prosty akcyjaner nie atrymaje zusim, zatoje ŭzraście vartaść jahonych akcyj, bo ŭzraście košt samoha pradpryjemstva, a novyja technalohii dazvolać zarabić jašče bolšy prybytak.
Vartaść akcyi — heta dobra, ale nia ŭ našaj krainie. Dziaržava tut apiakujecca ŭsimi nami, kab nichto broń Boža nie padmanuŭ. Tamu ŭ nas niamašaka paŭnavartasnaha rynku kaštoŭnych papieraŭ. Tyja akcyi vielmi ciažka niekamu pradać. Dyj pradpryjemstvy, što majuć dobry prybytak i perspektyvy, čamuści svaich akcyjaŭ lubomu nie pradajuć.
A na bolšaści astatnich zavodaŭ dziaržava trymaje 70—99% akcyj, i astatnim trymalnikam na tyja schody niama čaho chadzić, bo ŭsio ŭžo vyrašana naviersie.
