Dziarždepartament ZŠA abmiežavaŭ vydaču vizaŭ dla novych katehoryj biełaruskich čynoŭnikaŭ, a taksama ichnych žonak i mužoŭ. U śpis uvajšli aficery KHB i MUS u zvańni vyšej za padpałkoŭnika, supracoŭniki idealahičnych adździełaŭ, členy vybarčych kamisij.
7 žniŭnia pasolstva ZŠA raspaŭsiudziła pres-reliz, u jakim paviedamiła nastupnaje.
«Praz hod paśla pryniaćcia Prezidentam Bušam Prakłamacyi 8015 adnosna Biełarusi režym Alaksandra Łukašenki praciahvaje praktyku źniavoleńnia i pieraśledu hramadzian za vykazvańni ŭ abaronu demakratyi, praviadzieńnie mirnych demanstracyj i vystupleńni suprać represiŭnaj palityki režymu. Niahledziačy na toje, što minułaj viasnoj mieła miesca niekatoraje asłableńnie represiŭnych mieraŭ, na praciahu apošnich niekalkich tydniaŭ my stali śviedkami čarhovaha paharšeńnia situacyi z pravami čałavieka i demakratyjaj u Biełarusi.
U adpaviednaści z vyšejaznačanym, Dziarždepartamient ZŠA vydaŭ abnoŭlenaje rasparadžeńnie ad 3 žniŭnia 2007 hoda, jakoje ŭdakładniaje katehoryi asobaŭ, čyje zvaroty pa vizy aŭtamatyčna stanoviacca abjektam śpiecyjalnaha razhladu, jak taho patrabuje Prezidenckaja Prakłamacyja 8015. Prakłamacyja, vydadzienaja 15 maja 2006 hoda, prypyniaje ŭjezd u Złučanyja Štaty pa imihracyjnych ci nieimihracyjnych vizach asobaŭ, adkaznych za palityku albo dziejańni, što pahražajuć pracesu pierachodu da demakratyi ŭ Biełarusi.
Zhodna z abnoŭlenym vizavym rasparadžeńniem, ciapier abjektam pracedur, vyznačanych Prezidenckaj Prakłamacyjaj 8015, stanoviacca vizavyja zvaroty nastupnych asobaŭ:
• čynoŭnikaŭ uzroŭniu namieśnikaŭ ministraŭ i vyšej albo pryroŭnienych da ich;
• hienieralnaha prakurora i jaho namieśnikaŭ;
• aficeraŭ Ministerstva ŭnutranych spraŭ u zvańni vyšej za padpałkoŭnika;
• aficeraŭ KDB Biełarusi ŭ zvańni vyšej za padpałkoŭnika;
• supracoŭnikaŭ ideałahičnych adździełaŭ Minskaha haradskoha i abłasnych vykankamaŭ;
• kiraŭnika i namieśnikaŭ kiraŭnika Administracyi prezidenta;
• členaŭ Centralnaj vybarčaj kamisii;
• staršyń abłasnych vybarčych kamisij;
• staršyń abłasnych i rajonnych sudoŭ;
• staršyni Kanstytucyjnaha suda;
• dyrektaraŭ i namieśnikaŭ dyrektaraŭ dziaržaŭnych pradpryjemstvaŭ;
• sužencaŭ pieraličanych vyšej asobaŭ».
