 Mikita Sasim |
Rankam 17 žniŭnia stała viadoma, što moładzievaha aktyvista Mikitu Sasima zatrymali supracoŭniki pravaachoŭnych orhanaŭ. U Centralnym RUUS Miensku paviedamili, što maładoha apazycyjanera buduć sudzić, nie ŭdakładniŭšy pry hetym, pavodle jakoha artykułu. Raniej u Centralnym RUUS Miensku śćviardžali. što siarod zatrymanych apazycyjaner nia ličycca.
Uviečary 16 žniŭnia, u Dzień salidarnaści, moładzievy aktyvist Mikita Sasim byŭ schopleny nieviadomymi j źviezieny na mašynie UAZ. Incydent adbyŭsia a 21.30 kala kinateatru «Maskva», kali małady čałaviek kiravaŭsia dachaty.
Mikita Sasim braŭ udzieł u adnoj z akcyj, prymierkavanych da Dnia salidarnaści. Pavodle słoŭ vidavočcaŭ, z mašyny ź dziaržnumarami 9215 JEJE70 vybralisia ludzi ŭ cyvilnym i pačali z užyvańniem hrubaj fizyčnaj siły zapichvać Mikitu Sasima ŭ mašynu, pieradaje «Chartyja'97».
Na dapamohu da maładoha čałavieka pryjšli siabry, jakija byli ź im. U vyniku ludzi ŭ cyvilnym pavalili na ziamlu Tacianu Tyškievič i niekalki razoŭ udaryli jaje nahami. U vyniku paciarpiełaj vyklikali «chutkuju dapamohu» j advieźli ŭ bolnicu.
Mikita Sasim i jašče kala 100 maładych ludziej pryjšli ŭviečary 16 žniŭnia da kaściołu śviatoha Jazepa, kab pamalicca za ŭsich, chto, na ich dumku, cierpić represii ŭ Biełarusi. Adnak ad ścienaŭ kaściołu ich adcisnuli supracoŭniki APAPu.
Pry hetym pradstaŭniki pravaachoŭčych orhanaŭ bili maładych ludziej kułakami j užyvali hrubuju siłu, paviedamlajuć vidavočcy.
