Jak paviedamiła BiełaPAN dacent Minskaha dziaržaŭnaha linhvistyčnaha univiersiteta, kandydat fiłałahičnych navuk Ała Sakałoŭskaja, u 166‑staronkavaje vydańnie ŭvajšli vieršy paeta ź jaho biełaruskamoŭnych zbornikaŭ «Ksty» i «Być», raniej vydadzienych u Minsku rymska‑katalickaj abščynaj śviatych Symona i Aleny. Nahadajem, što za knihu duchoŭnaj paezii «Ksty» Ryhor Baradulin naminavany na Nobieleŭskuju premiju pa litaratury 2007 hoda.
Aŭtar pierakładu — Kašyna Hou — naradziŭsia ŭ 1972 h. na vostravie Chakajda, dzie ŭ miascovym univiersitecie skončyŭ fiłałahičny fakultet i aśpiranturu pry im. Z 2001 pa 2003 hady pracavaŭ u Minsku ŭ pasolstvie Japonii ŭ Biełarusi.
«Na dumku japonskich śpiecyjalistaŭ, Kašyna Hou prademanstravaŭ vysokaje majsterstva pierakładu jak bujnych vieršavanych form, u tym liku «Rymskaha dypcicha. Uzrušeńnie», pryśviečanaha papu rymskamu Janu Paŭłu II, tak i paetyčnych minijaciur, u tym liku akravierša», — zaznačyła A.Sakałoŭskaja.
Kašyna Hou maje vopyt raboty ź biełaruskim słovam — jon pierakładaŭ tvory Alesia Adamoviča i Uładzimira Karatkieviča.
«Malitva vietru» vydadziena namahańniami prafiesara Nahasakskaha univiersiteta Šuničy Jamašyty, jaki zajmajecca vyvučeńniem prablem radyjacyjnaha apramianieńnia čałavieka.
9 žniŭnia, u 62‑iu hadavinu atamnaj bambardziroŭki Nahasaki, kniha vieršaŭ Baradulina była pradstaŭlena meru horada i miascovamu katalickamj archibiskupu. U prezientacyjach udzielničali japonskija žurnalisty i biełaruskija dypłamaty, u tym liku časovy pavierany ŭ spravach Biełarusi ŭ Japonii Leanid Bacianoŭski — aŭtar pradmovy da zbornika.
«Trahiedyja Chirasimy, Nahasaki i Čarnobyla zbliziła japoncaŭ ź biełarusami. U zborniku pa‑iaponsku hučyć uschvalavanaje biełaruskaje słova i malitva vietru, jaki niasie nie čornyja chmary śmierci ŭsiamu žyvomu, a śvietyja abłoki dla taho, kab zielanieli pali i runieła duša», — zaznačyła A.Sakałoŭskaja.
Pavodle jaje słoŭ, u kancy vieraśnia ŭ Minsku zapłanavana prezientacyja paetyčnaha zbornika R.Baradulina, tvory jakoha pierakładzieny bolš čym na 30 movaŭ śvietu.
