«Living with Art»
Katałoh karcin… na žal, čaściakom jon składajecca ź blakłaj pieradačy aryhinałaŭ. Bo pieradać — heta tolki pryblizna paŭtaryć aryhinalnuju vyjavu. Kožny z nas źviedvaŭ pačućcio rasčaravańnia paśla prahladu katałoha: ci ž heta taja karcina, jakuju ja bačyŭ na vystavie albo ŭ muziei, u mastakoŭskaj majsterni albo na ścianie ŭ znajomca? Źnikaje adčuvańnie samoj karciny, jaje enierhietyki. Zrešty, i fatahrafija charyzmatyčnaha čałavieka nikoli nie paŭtoryć «aryhinał». Paŭstaje pytańnie: jak u poŭnaj miery možna pakazać čaroŭnaść i nastroj karciny?
U miežach prajektu było realizavanaje adno z mahčymych rašeńniaŭ taho, jak raskazać pra karcinu, pieradać jaje aŭru, danieści bolš čym prosta źmiarćviełuju kopiju. Heta rašeńnie, jakoje daje dakumientalnaja fatahrafija: jana pakazvaje nie tolki sam pradmiet, a taksama i miesca, dzie jon znachodzicca i ŭ niejkaj stupieni atmaśfieru vakoł jaho.
Prajekt paŭstaŭ dziakujučy prostaj idei: prasačyć za losam karcin Alaksandra Uołtniera (Alexander Waltner) i z dapamohaj dakumientalnaj fatahrafii pakazać, jak, z adnaho boku, karciny ŭpłyvajuć na svaich uładalnikaŭ, a ź inšaha — raskazać pra ich uładalnikaŭ i ich staŭleńnie da karcin. Što atačaje karciny (nie kalekcyjaniera), kali ludzi čyściać zuby, pracujuć, hulajuć, zasynajuć ci pračynajucca ŭrańni. Z dapamohaj 15 kalekcyjanieraŭ ź Vierchniaj Aŭstryi, jakija ŭziali ŭdzieł u prajekcie, aŭtar pasprabavaŭ adkazać na hetyja pytańni.
Hetak karciny Alaksandra Uołtniera pačali novaje žyćcio ŭ novym asiarodździ pobač z svaimi ŭładalnikami. Napruha i rełaksacyja, rozdum, zadavalnieńnie ad mastactva, spačyn dla vačej, dekaracyja, natchnieńnie — isnuje ahromnistaja kolkaść form supolnaha ich isnavańnia.
Fatohraf, jaki ŭ asnoŭnym dakumientuje žyćcio ludziej, hetym razam Andrej Lankievič stvaraje novaje bačańnie tvoraŭ mastactva, robić heta pranikliva i tvorča. Vializny dośvied pracy ź ludźmi dapamoh jamu pastavicca da žyvapisu Alaksandra Uołtniera jak da žyvoha arhanizma.
Andrej źmiaščaje karciny ŭ śviet ludziej, nadaje im inšaje atačeńnie i ŭ vyniku atrymlivajucca zusim novyja tvory. U ich — śviežy pohlad na žyvapis, jaki pačynaje žyć svaim ułasnym žyćciom, u miescach, zazvyčaj schavanych ad publiki — kvaterach, siadzibach i ofisach, dzie znachodziać prapisku pracy mastaka Alaksandra Uołtniera.
Vystavu fatahrafij možna pahladzieć u minskaj halerei «Padziemka», što mieścicca na praśpiekcie Niezaležnaści, 41 da 1 vieraśnia
