 Pavał Jakubovič |
Na sajt «SB», dzie voś užo niekalki dzion pracuje «virtualnaja pryjomnaja» Jakuboviča, čytač dasłaŭ paviedamleńnie ab tym, što ŭ haziecie «Naša Niva» pračytaŭ materyjał ab ciažkaj chvarobie Suzdalcava, viadomaha ŭ jakaści pastajannaha krytyka Jakuboviča. Čytač zapytaŭsia, ci rady žurnalist biadzie, jakaja napatkała palitołaha.
Padkreśliŭšy, što nie źjaŭlajecca voraham Andreja Ivanaviča i žadaje jamu chutčejšaha vyzdaraŭleńnia, Pavieł Izotavič źviarnuŭ uvahu na cikavy fakt:
«Suzdalcaŭ zaraz lečycca ŭ adnym z špitaloŭ Ministerstva abarony Rasii. Značycca, A.Suzdalcaŭ – starejšy aficer zapasu, pakolki tolki jany majuć prava lačycca ŭ vajskovych špitalach? Nie, Suzdalcaŭ, jak vynikaje ź jaho biahrafii na sajcie «NN», u vojsku nie słužyŭ. Zastajecca adno: Suzdalcaŭ - dziejučy aficer. Tankist, sapior, lotčyk? Nie. Fakt źmiaščeńnia palitołaha ŭ vajskovy špital śviedčyć ab tym, što Suzdalcaŭ – aficer śpiecsłužby, chutčej za ŭsio, HRU Hienštabu MA Rasii. Ciapier zrazumieła šmat z taho, što było zahadkaj. I asablivaja, vidavočna afarbavanaja ŭ raźviedkolery dziejnaść Suzdalcava ŭ Minsku, i jaho terminovaja departacyja, jakaja pa formie anałahična ź dziejnaściu ŭładaŭ, kali z krainy vysyłajecca raźviedčyk... Varta taksama pryznać, što paśladoŭnyja razmovy Paźniaka ab «špijonach», niebiespadstaŭnyja».
 Andrej Suzdalcaŭ |
Palitołah Andrej Suzdalcaŭ adkazaŭ na abvinavačvańni ŭ špijonskaj dziejnaści z boku redaktara haziety «Biełaruś siehodnia» («Sovietskaja Biełoruśsija»).
Kamientujučy Racyi vykazvańni Paŭła Jakuboviča ŭ «virtualnaj pryjomnaj» na sajcie haziety, Suzdalcaŭ zapeŭniŭ, što
«nikoli nie pracavaŭ, nie słužyŭ u dziaržaŭnych orhanach». «Zaraz źjaŭlajusia vykładčykam dziaržaŭnaha ŭniviersiteta — Vyšejšaj škoły ekanomiki. Heta pieršaja za ŭsio žyćcio maja «dziaržaŭnaja» pasada. Da hetaha ja ŭ dziaržavy braŭ hrošy tolki, kali byŭ studentam. Heta była stypiendyja».
Pa słovach ekśpierta, u Jakuboviča niama nijakich padstavaŭ ličyć jaho supracoŭnikam śpiecsłužbaŭ: «Usio vysmaktana z palca». Što datyčyć vajskovaha špitala, u jakim zaraz lečycca Suzdalcaŭ, to, pa jaho słovach, heta źviazana ź jaho suviaziami ŭ Saviecie fiederacyi i Saviecie biaśpieki Rasii:
«Andrej Ivanavič Suzdalcaŭ źjaŭlajecca dziejučym ekśpiertam Savieta fiederacyi, Savieta biaśpieki. Kali sa mnoju zdaryłasia biada, hetyja dźvie ŭstanovy pakłapacilisia ab tym, kab ja atrymaŭ vysokakvalifikavanuju miedyčnuju dapamohu. Ničoha hetaha ja nie chavaŭ. Kali b ja byŭ supracoŭnikam śpiecsłužbaŭ, paviercie, nichto b nie viedaŭ, dzia ja lačusia».
Na hetym spadar Suzdalcaŭ nie spyniŭsia i ŭ svaju čarhu abvinavaciŭ redaktara «SB»:
«Ja razumieju ŭvahu Paŭła Izotaviča da majho losu, pakolki mienavita jon zrabiŭ usio, kab prybrać mianie ź biełaruskaha palityčnaha pola. Mienavita jon sa staronak svajoj haziety abvinavaciŭ mianie ŭ aŭtarstvie niejkich ananimak. Darečy, «supracoŭnik śpiecłužby» — tradycyjnaje klajmo ŭ Biełarusi, jakoje viešajecca na luboha palityčnaha praciŭnika. Pavieł Izotavič zaraz prosta apraŭdvajecca. Jon cudoŭna viedaje, što piša chłuśniu. Viedaje, chto źmiaščaŭ tyja ananimki. Tam było zadziejničana KDB, i ŭžo vyśvietlili, što hetym zajmaŭsia druhi čałaviek. Jany pazbavili mianie doma, na hady adarvali ad siamji, a zaraz šukajuć sabie apraŭdańnia. Ja dziŭlusia, jak niekatoryja ludzi mohuć tak chłusić, nie viedajučy pra čałavieka pa sutnaści ničoha».
