Usio ž niezdarma, musić, tak borździeńka lapili na pačatku leta "Biełuju Ruś". Praprezydenckaja pratapartyja (vo zakruciŭ, jazyk złomiš:) moža ŭstupić u hulniu, kali budzie pierahledžany Vybarčy kodeks. Siońnia ab takoj mahčymaści zajaviŭ admysłovy pradstaŭnik ministra zamiežnych spraŭ Siarhiej Hajdukievič. Naŭrad ci heta ekspromt, nia ŭzhodnieny naviersie.
Ahučany Hajdukievičam śpis mahčymych sastupak Bruselu vyhladaje tak: "My zhodnyja na adkryćcio pradstaŭnictva Eŭrakamisii i biuro Eŭraparlamentu ŭ Biełarusi. My hatovyja razhladać pytańnie ab vybarčym zakanadaŭstvie. Možna, naprykład, pierajści z mažarytarnaj na praparcyjna-mažarytarnuju systemu vybaraŭ. Kali atrymajecca dyjaloh z Eŭropaj, my taksama možam uvieści pasadu ambudsmena".
Faktyčna abmalavany maksymum taho, na što moža siońnia pajści aficyjny Miensk. Niahusta. Viazkija pieramovy ab adkryćci pradstaŭnictva Eŭrakamisii doŭžacca ŭžo boh viedaje kolki času. Uviesnu hučała, što zastalisia nibyta techničnyja detali. Daŭno siadzić na valizkach u Kijevie budučy kiraŭnik pradstaŭnictva sp.Chalcapfel. Traktavać čakany pierajezd hetaha šanoŭnaha džentlmena ŭ Miensk jak praryŭ u dačynieńniach z Zachadam było b vialikaj naciažkaj:)
Naturalna, nia zrobić tut revalucyi (ni ŭ naŭprostavym, ni ŭ pieranosnym sensie) i sama praca novaha ofisu. Ci navat dvoch, kali aščaśliviać šyrokim žestam jašče i Radu Eŭropy (vidać, vystupoŭca mieŭ na ŭvazie perspektyvu adkryć infarmbiuro mienavita hetaj instytucyi. Va ŭsiakim razie, pra heta prasiŭ u Miensku sp.van der Linden. Eŭraparlament ža jość nie paneŭrapiejskaj strukturaj, a vorhanam Eŭraźviazu). Na ŭnutrypalityčnuju sytuacyju jany zdolnyja paŭpłyvać, badaj, nia bolej, čym zvyčajnyja ambasady. Dyj nia ich sprava razhojdvać našu łodku. BT budzie kožny krok pilnavać:)
Što da pasady ambudsmena, dyk taki varyjant daŭno prahnazavaŭ Anatol Labiedźka, sarkastyčna dadajučy, što voś voźmuć dy daručać misyju viadomamu deputatu Kaścianu. Va ŭsiakim razie, ciažka ŭjavić fihuru, jakaja b zadavoliła i ŭładu, i apazycyju.
Novym momantam padajecca chiba što hatovaść da pierahladu Vybarčaha kodeksu. Jašče niadaŭna spn.Jarmošyna davodziła, što łamać jaho niama patreby. Zrešty, pierachod da vybaraŭ z vykarystańniem partyjnych śpisaŭ palitolahi pačali prahnazavać, jak tolki pajšoŭ praces farmavańnia "Biełaje Rusi". Razam z tym, nia fakt, što nastupnaja parlamenckaja kampanija projdzie pa novaj systemie. Pierarobka vybarčaha zakanadaŭstva — sprava niachutkaja.
Hałoŭnaje ž dla aficyjnaha Miensku — uciahnuć Eŭropu ŭ drobny handal, jaki ničoha nie vyrašaje. Nazarbajeŭ dniami pakazaŭ majstar-klasu, jak damahacca "elehantnaj pieramohi" pry "prasunutaj" vybarčaj systemie.
ZY. Prahnoz, kali apazycyja voźmie uładu, šukajcie pa hiperspasyłcy.
