A. Łukašenka zahadaŭ zharnuć zamiežnyja investycyi ŭ pivavarnuju halinu.
Na dumku A.Łukašenki, u nas dastatkova ŭłasnych srodkaŭ i mahčymaściaŭ.
Stratehija dalejšaha raźvićcia pivavarnaj haliny Biełarusi stała nahodaj dla admysłovaj narady ŭ prezydenta. A. Łukašenka pastaviŭ pytańnie: «Nam važna ciapier vyznačycca: pryciahvać zamiežnyja kampanii ŭ hety vyklučna vysokadachodny biznes abo samim raźvivać hetuju halinu». I tut ža dylemu raźviazaŭ. «Jakaja dziaržava, majučy taki vialiki rynak, jak u nas, niezadavoleny popyt, admovicca ad hetaha vysokaprybytkovaha biznesu? Dyk čamu my admaŭlajemsia i addajom jaho ŭ ruki zamiežnym kampanijam? Nie ŭłasnym pryvatnym, a zamiežnym? Čamu dziaržava choča pajści z hetaha sektaru ekanomiki? Dla taho kab vyjści na samy sučasny ŭzrovień, jak, dapuścim, na AAT «Krynica», nam nieabchodna kala $125 młn. Usiaho $125 młn. na madernizacyju ŭsiaho sektara, kab atrymać piva, jakoje my chočam!». Svaje słovy prezydent padmacavaŭ dumkaj, što madernizacyja piŭzavodaŭ na srodki dziaržavy dazvolić u budučyni pry nieabchodnaści pradać pradpryjemstvy značna daražej. Abjom spažyvańnia piva siarod biełarusaŭ uzrastaje štohod na 20%, što pavodle Łukašenki, što śviedčyć pra vialiki patencyjał naroščvańnia prodažaŭ na ŭnutranym rynku.
Jak adznačaje BiełTA, urad pradstaviŭ prezydentu ŭ jakaści vyjścia z sytuacyi varyjant pryvatyzacyi pivavarniaŭ zamiežnymi kampanijami, adnak «dyskusija, jakaja razharnułasia na naradzie, pakazała, što arhumenty prychilnikaŭ prodažu viadučych pradpryjemstvaŭ pivavarnaj haliny zamiežnym investaram akazalisia niedastatkova važkimi i nie vyhladali pierakanaŭča». Miž inšym taki varyjant praduhledžvaŭ šerah umovaŭ, siarod jakich – zachavańnie pracoŭnych miescaŭ i specyjalizacyi pradpryjemstvaŭ, vytvorčaść piva z ułasnaj syraviny dy naroščvańnie ekspartnaha patencyjału. Staršynia Prezidyuma Nacyjanalnaj akademii navuk Biełarusi Michaił Miaśnikovič vykazaŭsia, što pry nieabchodnaści možna pryciahnuć u halinu zamiežnyja investycyi i biaz źmieny formy ŭłasnaści pradpryjemstvaŭ.
Varta adznačyć, što jašče hod tamu Łukašenka daručyŭ uradu raspracavać umovy konkursu investycyjnych prapanoŭ, u tym liku pa ŭvachodžańni zamiežnych kampanij na biełaruski pivavarny rynak. Patencyjnyja investary adreahavali aperatyŭna: naprykancy minułaha hodu VVN nabyŭ za $18,5 młn. 30% akcyj AAT «Piŭzavod «Alivaryja», i tempy rostu hetaha brovaru adrazu stali najvyšejšymi ŭ krainie. Toje samaje i z babrujskaj kampanijaj «Siabar», utvoranaj pry ŭdziele Detroit Investment Ltd. Miž tym tempy rostu zbytu pradukcyi «Krynicy», kudy zachodnija investary nie pryjšli, sioleta najnižejšyja, kali nie ličyć pamirajučych drobnych brovaraŭ.
Sprava ŭ tym, što zachodnija brovary investujuć nia tolki ŭ technalohii, ale i ŭ markietynh, u čym majuć niemały dośvied.
Na siońnia svaje pasłuhi biełaruskamu boku akramia vyšejpamianionych kampanijaŭ prapanavali Heineken, SABMiller i kampanija Group Soufflet. Apošniaja cikavicca mahčymaściu pryvatyzavać «Biełsoład», Heineken — razhladała mahčymaść ukłaści srodki ŭ AAT «Bieraściejskaje piva» dy «Lidzkaje piva».
U Biełarusi vytvorčaściu piva zajmajucca 12 specyjalizavanych arhanizacyj roznych formaŭ ułasnaści, ź ich 6 bujnych biełaruskich kampanijaŭ vypuskajuć amal 97% ad usiaho ab'mu piva. Prahrama raźvićcia pivavarnaj haliny respubliki na 2006‑2010 hh praduhledžvaje naroščvańnie vytvorčych mahutnaściaŭ da 64,1 młn. dał da 2010 h. (u 2005 h. vypuścili 46,3 młn. dał), abjom vypusku piva – da 60 młn. dał (27,2 młn. dał u 2005 h.).
