Subotnim viečaram moładź 17—21 hadoŭ sabrałasia ŭ vioscy Vierbavičy Naraŭlanskaha rajona, kab adśviatkavać dzień naradžeńnia biblijatekarki Doma kultury. Dyskateka da paŭnočy zakončyłasia, i viasiołaja kampanija pajšła praciahvać uračystaści na dvor, dzie pražyvali dvoje z prymaŭšych udzieł u hulańniach. Kala troch nočy žanočaja pałova kampanii ŭ poŭnym składzie pakinuła pamiaškańnie, a piaciora chłopcaŭ zastalisia, pasnuŭšy na łožkach... Ab pažary pastupiła paviedamleńnie na šostaj hadzinie ranicy. Paśla likvidacyi pažaru na papiališčy byli znojdzieny cieły čatyroch chłopcaŭ, jakija mocna abhareli. Adzin čałaviek z apiokami 60 pracentaŭ cieła byŭ dastaŭleny ŭ Naraŭlanskaje TMA. U hety ž dzień u ciažkim stanie jon byŭ adpraŭleny ŭ Homiel u apiokavy centr.
Što stała pryčynaj pažaru, śpiecyjalisty MNS pakul vyśviatlajuć, ale najbolš vierahodnaj viersijaj źjaŭlajecca nieaściarožnaje abychodžańnie z ahniom. Heta abo kinuty niedakurak, abo niaŭmiełaje raspalvańnie piečy, niadaŭna pastaŭlenaj u prybudovie. Ale ŭ lubym vypadku pieršačarhovaj pryčynaj, jak miarkujecca, źjaviłasia śpirtnoje.
