BiełaPAN paviedamlaje pra "krapivienski chapun". Vyhladaje na toje, što sioleta śviatkavańnie ŭhodkaŭ Aršanskaje bitvy apynułasia pad asabliva pilnym nahladam. Možna navat skazać, pad kaŭpakom.
Raniej tak nie presynhavali. Ja nie kažu ŭžo pra fenamenalny dzień 8 vieraśnia 1992 hodu, kali na płoščy Niezaležnaści adbyłasia masavaja prysiaha na viernaść Biełarusi.
A ŭ hetyja chviliny na toj samaj płoščy publika źbirajecca vakoł novaha cyklapičnaha fantana na šyroka razreklamavanuju śvietłamuzyčnuju imprezu. (Darečy, hieneralnaja repetycyja nia nadta uraziła.)
Ułada, całkam u tradycyjach vaładaroŭ Staražytnaha Rymu, daje narodu chleba dy vidoviščaŭ. Hałoŭnaje — kab u mazhach nie było palityki. Uładzie zručnyja tyja, chto dumaje straŭnikam, a duchoŭnyja patreby vyznačaje słovam "bałdzieć".
Moładź pad Voršaj chapajuć tamu, što jana śviatkuje pavodle ŭłasnaha scenaru, nie praštampavanaha ŭ kabinetach "vertykali". Toje śviatkavańnie nie źmiaščajecca ŭ prakrustaŭ łožak kazionnaj idealohii, pulsuje kreatyvam i viasiołaj frondaj, a tamu apryjory niebiaśpiečnaje.
Zdavałasia b, siońnia akurat čas pieraasensavać idealohiju. Užo i vožyku zrazumieła, što miednym tazam nakryłasia taja "bratniaja intehracyja", u razhar jakoj našym dziaržaŭnym mužam zdavałasia žachliva niepalitkarektnaj sama zhadka pra toje, jak voi Astroskaha nataŭkli pysu ahresaram z uschodu.
Čamu ž ułada tarmozić? Reč, badaj, nie ŭ niedaśviedčanaści. Daradcy, peŭna ž, daŭno pakłali na stoł načalstvu patrebnyja histaryčnyja daviedki.
Tut — mentalny barjer. Na poli sapraŭdnaj nacyjanalnaj historyi siońniašniaja ŭłada pačuvajecca niaŭtulna, byccam biez adziežy. Ciapier jana, ułada, niby ŭ stalinskim frenčy. A tak treba prymiervać daśpiechi vialikich kniazioŭ. A jakoje tut rycarstva!..
Samaje ž sumnaje, što ad histaryčnych karanioŭ adarvanaja masa. Pakul jaje možna karmić saŭkovym varyjantam historyi — našto lišni tłum, lišnija navaroty? Vuń BRSMaŭskija dziejačy chutka daviaduć, što i Muraŭjoŭ-viešalnik — kumir.
Aficyjnyja ideolahi spres dziaŭbuć pra vychavańnie patryjotaŭ. Adnak pad "patryjotami" majuć na ŭvazie idealahičnych zombi. Im nakidajuć tojesnaść miž Ajčynaj i dziaržavaj, u ich vypracoŭvajuć pasłuchmianaść robataŭ. Hramadzianin ža vyrazna razumieje, što "ŭłada" i "Radzima" — nia tojesnyja rečy. I hatovy, kali treba, trochi napružvać uładu, kab u vyniku stała lepiej Radzimie.
Kazionnych patryjotaŭ (a nasamreč inertnych abyvatalaŭ, hatovych chadzić statkam) zručniej farmavać praz saŭkovuju traktoŭku historyi. Kali ŭłada adčuje patrebu ŭ sapraŭdnych hramadzianach, jana zhadaje i pra Aršanskuju bitvu. Ale, musić, heta budzie ŭžo inšaja ŭłada.
