Subotni matč sa zbornaj Rumynii staŭ pieršym aficyjnym dla novaha trenera našaj kamandy niemca Bernda Štanhie. Čakać stanoŭčaha vyniku ad hetaj hulni było b krychu naiŭna – rumyny ciapier znachodziacca na sapraŭdnym padjomie, nie prajhrajučy ciaham apošnim dvanaccaci hulniaŭ, biełarusy ž značna abnavili skład, admoviŭšysia ad niekalki veteranaŭ i zaprasiŭšy ŭ kamandu maładych nieabstralanych hulcoŭ.
Zrešty, hulnia absalutna nie dała povadaŭ dla pesymizmu. Našy chłopcy syhrali na roŭnych z hroznymi rumynami. Lik adkryli hości, na 16-aj chvilinie adznačyŭsia Adryjan Mutu – 0:1. Adnak užo praz čatyry chviliny Maksim Ramaščanka paśla cudoŭnaj pieradačy Alaksandra Hleb vyraŭniaŭ lik – 1:1.
Za dźvie chviliny da śvistka na pierapynak rumyny znoŭ vyjšli napierad. Dzikie, jaki zabivaŭ i barysaŭskamu BATE ŭ Lizie čempijonaŭ, zamknuŭ hałavoj flanhavuju pieradaču Nikalice – 1:2.
U druhim tajmie niabieśpiečnyja momanty ŭźnikali la abiedźviuch bramaŭ. Praŭda, zabić zmahli tolki rumyny. Na 75-aj chvilinie Vasil Chamutoŭski parušyŭ praviły va ŭłasnaj štrafnoj, paśla švedzki arbitar pryznačyŭ penalci. Adryjan Mutu nie pramachnuŭsia – 1:3.
Taki samy lik byŭ zafiksavany i hod nazad u Buchareście.
Zrešty, na ŭsie matčy sioletniaha adboračnaha cyklu hieru Štanhie dadzieny kart-blanš. Pa-sapraŭdnamu ź jaho spytajuć užo naleta, a ciapier možna i eksperymentavać.
Nastupny matč naša kamanda praviadzie 12 vieraśnia sa zbornaj Słavienii ŭ Cele.
