 |
Ćviarski sud Maskvy prysudziŭ biełarusaŭ da 14-hadovaha źniavoleńnia za ŭvoz u Rasieju tysiačy tabletak ad kašlu.
Dvum hramadzianam Biełarusi Alaksandru Čačuravu j Siarhieju Łahunu inkryminujecca kantrabanda i niezakonny prodaž psychatropnych rečyvaŭ. Jany byli zatrymanyja j uziatyja pad vartu supracoŭnikami ŭpravy federalnaj słužby pa kantroli za niezakonnym abaračeńniem narkotykaŭ pa centralnaj akruzie Maskvy 7 sakavika.
«Supracoŭnik FSKN adrekamendavaŭsia aptekaram i praź internet zamoviŭ partyju polskich lekaŭ tusał. Čačuraŭ i Łahun pryvieźli 1000 tabletak u Maskvu i byli zatrymanyja», — patłumačyŭ advakat adnaho z padsudnych Jaŭhien Čarnavusaŭ.
Jon śćviardžaje, što kali b i byli dapuščanyja parušeńni z boku hramadzian Biełarusi, to jany nie padpadajuć pad artykuł administracyjnaha kodeksu.
«Jany vieźli tabletki nie pradavać narkamanam, a ŭ apteku. Heta maksymum parušeńnie farmaceŭtyčnaj dziejnaści, što ciahnie administracyjnaje pakarańnie» — zajaviŭ Čarnavusaŭ.
Tusał nia ŭklučany ŭ pieralik zarehistravanych u Rasiei preparataŭ. Hetyja tabletki ŭtrymlivajuć psychatropnaje rečyva dekstrametarfan hidrabamid u małych dozach.
«U 1 tysiačy tabletak utrymlivajecca 15,4 milihrama psychatropnaha rečyva, i za heta prosiać 14 hadoŭ» — skazaŭ abaronca j dadaŭ, što Eŭrapiejskaja kanvencyja ad 1971 hodu dapuskaje ŭtrymańnie psychatropnych rečyvaŭ u lekach u małych dozach.
Pavodle słoŭ Čarnavusava, u anatacyi da lekavaha preparatu paznačana, što jaho mohuć užyvać navat maleńkija dzieci.
Advakaty asudžanych najbližejšym časam majuć namier padać skarhu na abvinavaŭčy prysud, a taksama źviarnucca ŭ Eŭrapiejski sud pa pravach čałavieka ŭ Strasburhu.
