 Viktar Juščanka |
Prezydent Ukrainy Viktar Juščanka abvinavaciŭ prezydenta Rasiei Ŭładzimiera Pucina ŭ tym, što toj admoviŭsia dapamahać raśśledavać daŭniaje atručeńnie Juščanki dyjaksinam. Ukrainski prezydent ličyć heta jašče adnym paćvierdžańniem taho, što ślady atručvalnika viaduć u Rasieju.
U aŭtorak eŭrapiejskija hazety nadrukavali interviju ź Viktaram Juščankam, u jakim jon vystupiŭ z abvinavačvańniami na adras Uładzimiera Pucina z nahody svajho atručeńnia dyjaksinam u 2004 h. Ukrainski prezydent sustreŭsia z žurnalistami napiaredadni, na pres‑kanferencyi. Kali havorka zajšła ab atručeńni Juščanki pierad prezydenckimi vybarami ŭvosień 2004 h., jon zajaviŭ francuskaj Le Figaro:
«Pierakanany, što dyjaksin, jaki, jak ustanoŭlena, byŭ vykarystany pry atručeńni, vyrableny ŭ adnoj z rasiejskich labaratoryjaŭ». Pry hetym, upieršyniu zajaviŭ Juščanka, usie abstaviny ŭkazvajuć na toje, što «za atručeńniem staić dziaržava, a nie asoby».
Nie vinavaciačy naŭprost rasiejskaje kiraŭnictva, ukrainski prezydent, tym nia mienš, paviedamiŭ,što Rasieja admaŭlajecca supracoŭničać pa spravie ab atručeńni, navat niahledziačy na toje, što jon asabista prasiŭ ab sudziejańni rasiejskaha prezydenta Ŭładzimiera Pucina.
Havoračy ab adsutnaści kaaperacyi z boku Rasiei, Juščanka paskardziŭsia, što Kreml admoviŭsia pradstavić ukrainskim śledčym uzory dyjaksinu, jaki vyrablajecca ŭ rasiejskich labaratoryjach. Miž tym, daŭ zrazumieć Juščanka, udzieł Rasiei ŭ jahonym atručeńni ŭstanaŭlivajecca šlacham vyklučeńnia.
«U śviecie ŭsiaho try labaratoryi, što vyrablajuć dyjaksin takoj formuły. Dźvie krainy (ZŠA i Vialikabrytanija) pradastavili ŭzory svajoj vytvorčaści, Rasieja — nie. Heta ŭskładniaje pracu našych śledčych», — arhumentavaŭ ukrainski lider.
Jon dadaŭ, adkazvajučy karespandentu The Times, što «vyznačyć pachodžańnie atrutnaha rečyva nieskładana. Tut niama nijakaj mahii». Pavodle prezydenta, aficyjnaje raśśledavańnie spravy ab atručeńni ŭkrainskimi śledčymi amal skončanaje. Ustanoŭlenaja rola ŭsich fihurantaŭ.
«Śledztva viedaje, chto, kali i dzie, a taksama jakaja atruta vykarystoŭvałasia», — skazaŭ Juščanka. Tut jon iznoŭ ukazaŭ na Rasieju: «Pa spravie prachodziać try asnoŭnyja padazravanyja, i ŭsie jany znachodziacca ciapier u Rasiei. Ukraina nakiroŭvała zapyt rasiejskaj Hienprakuratury z nahody pradstaŭleńnia hetych ludziej dla praviadzieńnia raśśledavańnia na Ŭkrainie, adnak ad rasiejskaha boku nie było atrymana anijakaha adkazu».
Imiony asnoŭnych padazravanych Juščanka nie nazvaŭ. Miž tym, vidavočna, viadziecca pra byłoha kiraŭnika Słužby Biaśpieki Ŭkrainy (SBU) Ihara Śmiaška i jahonaha byłoha namieśnika Ŭładzimiera Saciuka. Jak śćviardžajuć ukrainskija śledčyja, Juščanka źniaviečany amal śmiarotnaj dozaj dyjaksinu 5 vieraśnia 2004 hodu, paviačeraŭšy sa Śmiaškom na leciščy ŭ Saciuka. Miescaznachodžańnie Śmiaška i Saciuka na ciapierašni momant nieviadomaje. U hetym miesiacy advakat Saciuka zajaviŭ ukrainskim ŚMI, što jahony klijent «pa stanie zdaroŭja dakładna znachodzicca nia ŭ Kijevie».
Zajava ab tym, što hałoŭnyja padazravanyja chavajucca ŭ Maskvie, była zroblenaja ŭkrainskim prezydentam upieršyniu.
Anijakich paćvierdžańniaŭ svaim słovam Juščanka nie pryvioŭ.
Miž tym u aŭtorak stała viadoma, što raśśledavańnie spravy ab atručeńni Viktara Juščanki ŭznačaliła staršy śledčy pa asabliva važnych spravach Hienprakuratury Ŭkrainy Halina Klimovič. Pra heta paviedamili infarmavanyja krynicy ŭ Hienprakuratury. Dniami Klimovič była pieraviedzienaja z Adesy ŭ Kijeŭ. Jana specyjalizujecca na raśśledavańni zamoŭlenych zabojstvaŭ. Jak kamentuje ahienctva «Novosti‑Ukraina», Klimovič ličycca adnym z najbolš sumlennych, prafesijnych i bieskampramisnych śledčych Hienprakuratury Ukrainy. Mienavita jana raskryła ŭ svoj čas złačynstva kryvavaj adeskaj bandy Marjančuka (złačynnaj hrupa arhanizavała zabojstva redaktara hazety «Viečierniaja Odiessa» Barysa Dzieravianka, zamach na mera Adesy Eduarda Hurvica i na samu Klimovič). Pavodle paviedamleńniaŭ ukrainskich ŚMI, na žyćcio Klimovič zamachvalisia dvojčy. U Kijevie jana budzie pracavać pad pastajannaj achovaj.
Važna, što abvinavačvańni Viktara Juščanki na adras Rasiei prahučali na pačatku vybarčaj kampanii na Ŭkrainie i analahičnaha peryjadu ŭ Rasiei. Užo amal ścichły skandał z atručeńniem Juščanki moža iznoŭ nabrać abaroty taksama na fonie spravy ab atručeńni ŭ Londanie eks‑ahienta FSB Alaksandra Litvinienki. U minułyja tydni Londan źniziŭ uzrovień supracoŭnictva z Rasiejaj, abvinavaciŭšy Kreml u niedastatkovaj kaaperacyi.
