Za apošnija 10 hadoŭ u Biełarusi vyjaŭlena bolš za 346 tys. chvorych na rak, paviedamiŭ 11 vieraśnia na pres‑kanfierencyi ŭ Minsku dyrektar Navukova‑daśledčaha instytuta ankałohii i miedycynskaj radyjałohii im. Alaksandrava, prafiesar Iosif Załucki.
Pavodle jaho słoŭ, u apošnija hady kolkaść ankałahičnych zachvorvańniaŭ uzrastaje praktyčna va ŭsim śviecie, spynić hety praces udałosia tolki ŭ ZŠA i krainach Zachodniaj Jeŭropy. U Biełarusi, pavodle danych śpiecyjalista, kolkaść zachvorvańniaŭ na rak za apošnija 6 hadoŭ pavialičyłasia na 13,4% i skłała 373,7 vypadki na 100 tys. nasielnictva. U toj ža čas, u krainie źnižajecca śmiarotnaść ad ankałohii. Za zhadany pieryjad jana źniziłasia na 16,2% i skłała 166,7 vypadki na 100 tys. nasielnictva.
Havoračy ab samych raspaŭsiudžanych formach raku ŭ Biełarusi, I.Załucki paviedamiŭ, što siarod mužčyn lidzirujuć rak lohkich, rak toŭstaj kiški i rak straŭnika. Žančyny čaściej za ŭsio zachvorvajuć na rak małočnaj załozy, i taksama na rak toŭstaj kiški i na rak straŭnika. Tak, letaś u Biełarusi na rak lohkich zachvareli 3 tys. 515 čałaviek, na rak małočnaj załozy — 3 tys. 309 čałaviek, na rak straŭnika — 3 tys. 205 čałaviek, na rak toŭstaj kiški — 3 tys. 650 čałaviek. Usiaho ž letaś upieršyniu vyjaŭlena 33 tys. 880 chvorych na złajakasnyja novaŭtvareńni.
Śpiecyjalist zaznačyŭ, što na siońniašni dzień navukova ŭstanoŭlena suviaź «čarnobylskaha faktara» tolki z uźniknieńniem raku ščytapadobnaj załozy. Naohuł, pavodle jaho słoŭ, absalutny pryrost ankachvorych u Biełarusi z 1986 hoda pa 2005‑j takoj ža, jak i z 1970‑ha pa 1986‑y.
Jak paviedamiŭ I.Załucki, ciapier na dyspansiernym uliku ŭ ankałahičnaj słužbie krainy staić kala 203 tys. čałaviek, pry hetym kala 52% ź ich žyvuć z hetaj chvarobaj 5 i bolš hadoŭ. Pavodle słoŭ śpiecyjalista «viartańnie chvaroby mahčyma, ale čaściej za ŭsio heta adbyvajecca na praciahu pieršych dvuch dzion». Na jaho dumku, dla efiektyŭnaha lačeńnia raku vialikaje značeńnie maje jaho rańniaje vyjaŭleńnie — u hetym vypadku mahčymaść vylečvańnia składaje kala 95%. Dla hetaha, pavodle jaho słoŭ, kožny pacyjent pavinien rehularna prachodzić miedycynskaje abśledavańnie.
