 Michaił Fradkoŭ |
 Viktar Zubkoŭ |
 Siarhiej Ivanoŭ |
 Dźmitry Miadźviedzieŭ |
Adstaŭka Fradkova stała sensacyjaj, adnak supersensacyjaj stała novaje pryznačeńnie. Usie čakali, što novym premjeram stanie Siarhiej Ivanoŭ, jakoha mierkavali ŭ pierajemnika - samy papularny, paśla Pucina, na siońnia palityk Rasiei. Adnak Uładzimier Pucin unios na razhlad Dziarždumy na pasadu premjera kandydaturu niezaŭvažnaha kiraŭnika Raśfinmanitorynha Viktara Zubkova. Pra heta paviedamiŭ žurnalistam śpikier nižniaj pałaty parlamentu Barys Hryzłoŭ. Śpikier prapanavaŭ deputatam razhledzieć kandydaturu Zubkova na pasiedžańni ŭ najbližejšuju piatnicu.
Siońnia ŭ Kramli na sustrečy Ŭładzimiera Pucina i Michaiła Fradkova apošni paprasiŭ prezydenta Rasiei ab adstaŭcy ŭradu. Pucin prośbu zadavoliŭ.
Michaił Fradkoŭ zajaviŭ, što sychodzić z‑za «majučych adbycca bujnych palityčnych padziej u krainie, i žadaje dać prezydentu Rasiei poŭnuju svabodu vybaru rašeńniaŭ, uklučajučy kadravyja».
Pucin padziakavaŭ Fradkovu za dasiahnutyja vyniki ŭ pracy i ŭznaharodziŭ jaho ordenam «Za zasłuhi pierad Ajčynaj» I stupieni. Pry hetym prezydent Rasiei prapanavaŭ Fradkovu vykonvać abaviazki staršyni ŭradu da vyznačeńnia Dziarždumaj kandydatury novaha staršyni ŭradu. Paśla čaho Fradkoŭ sabraŭ Saviet ministraŭ na terminovaje pasiedžańnie.
Viktar Zubkoŭ, jaki naradziŭsia ŭ 1941 h. u v. Arbat Śviardłoŭskaj vobłaści, za savieckim časam prajšoŭ šlach ad ślesara na Mančahorskim zavodzie ŭ Murmanskaj vobłaści i dyrektara saŭhasu ŭ Leninhradzkaj vobłaści da pieršaha sakratara Pryaziorskaha harkamu KPSS i zahadčyka ahrarnaha adździełu Leninhradzkaha abkamu partyi. U 1992 - 1993 hh. – pieršy namieśnik staršyni Kamitetu pa zamiežnych suviaziach meryi Sankt-Pieciarburhu; u 1993-1998 – namieśnik kiraŭnika Dziaržaŭnaj padatkovaj słužby Rasiei – načalnik Dziaržaŭnaj padatkovaj inspekcyi ŭ h. Sankt-Pieciarburhu.
Eksperty zaznačajuć, što pačałasia aperacyja «Pierajemnik». Novy premjer-ministar moža aŭtamatyčna stać kandydytam na pasadu prezydenta. Vybary ŭ Rasiei majuć prajści ŭviesnu nastupnaha hodu.
U žniŭni 1999 h. Barys Jelcyn pryznačyŭ na pasadu premjera małaviadomaha tady Uładzimiera Pucina, a 31 śniežnia 1999 h. pieradaŭ jamu prezydenckija paŭnamoctvy.
Na pasadu mahčymaha pierajemnika Pucina raniej nazyvalisia dźvie kandydatury: vice-premjeraŭ Siarhieja Ivanova i Dźmitryja Miadźviedzieva. Pryčym bolšaść ekspertaŭ apošnim časam schilałasia da kandydatury Ivanova, jak bolš padrychtavanaha da premjerstva i prezydenctva. Dyj Pucin čaściej staŭ źjaŭlacca na publicy razam ź Ivanovym.
